Magkakampi na ang mga dilawan at loyalist politicians, anyare?

ni Pablo Hernandez @Prangkahan | May 28, 2025

TIYAK NA MAY KIKITA NA NAMAN SA OVERPRICED NA FACE MASK KAPAG DUMAMI ANG MABIKTIMA NG COVID-19 SA ‘PINAS -- Dumarami na naman daw ang nabibiktima ng COVID-19 sa China, Hong Kong, Singapore at Thailand.

Naku po, huwag naman sanang dumami ang magkaka-COVID-19 sa ‘Pinas kasi siguradong may mga kurakot na naman na kikita ng limpak-limpak na salapi sa pag-aangkat ng mga overpriced na face mask, boom!

XXX

PATONG-PATONG NA KASONG KRIMINAL ISASAMPA NI SEC. CACDAC KAY ARNELL IGNACIO -- Kinontra ni Sec. Hans Cacdac ng Dept. of Migrant Workers (DMW) ang sinabi ni former Overseas Workers Welfare Administration  (OWWA) Administrator Arnell Ignacio na may permiso raw ng OWWA-Board of Trustees ang pagbili ng ahensya ng P1.4 billion lupa para sa mga overseas Filipino workers (OFWs).

Sinabi ni Cacdac, binili raw muna ni Ignacio ang lupa at saka in-inform ang OWWA-Board of Trustees, na ang dapat daw ginawa nito (Ignacio) ay hiningi muna ang approval ng OWWA-Board of Trustees bago bilhin ang lupa para sa mga OFWs.

Kitam, palusot lang talaga ni Ignacio na may approval ng OWWA-Board of Trustees ang pagbili niya ng lupa, at dahil illegal ang ginawa niya, sabi ni Cacdac ay sasampahan nila ito (Ignacio) ng patong-patong na kasong kriminal, period!

XXX

MAGKAKAMPI NA ANG MGA DILAWANG PULITIKO AT MGA LOYALIST POLITICIANS -- Sabi ni Quezon Rep. David Suarez ay sumuporta na rin daw sa speakership ni Leyte Rep. Martin Romualdez ang mga kongresistang kasapi ng Liberal Party (LP).

Patunay iyan na ang mga pulitikong dilawan at mga loyalistang politicians ay mga magkakampi na, boom!

XXX

KAPAG PALPAK ANG HEAD NG AGENCY, DAPAT SIBAKIN NI PBBM, HUWAG NA ILILIPAT LANG SA IBANG DEPARTAMENTO -- Sinabi ni Executive Sec. Lucas Bersamin na marami raw tatamaan sa balasahang isasagawa ni Pres. Bongbong Marcos (PBBM) sa mga Cabinet members.

Aba teka, bakit babalasahin o ililipat lang ng puwesto?

Dapat kasi, kung palpak ang pamumuno sa isang ahensya ng pamahalaan, ang dapat gawin ni PBBM ay sibakin ito sa puwesto at hindi para ilipat lang sa ibang departamento ng pamahalaan, period!