Mag-asawang titser, kinatay sa bahay

ni Mai Ancheta @News | October 6, 2026

Photo: File

Malagim na kamatayan ang sinapit ng mag-asawang retiradong guro makaraang matagpuan ang kanilang bangkay sa loob ng kanilang tahanan na may mga tama ng saksak sa katawan at ulo sa Brgy. Poblacion 2, Banisilan, Cotabato nitong Linggo.

Kinilala ang mga biktima na sina Elsa, 82, at Edwin Galeno, 81, kapwa retiradong guro.

Batay sa pulisya, naalerto ang mga kapitbahay ng mag-asawa makaraang marinig ang paghingi ng tulong ng mga ito alas-3 ng madaling-araw.

Agad na ini-report sa mga otoridad ang insidente at nang tingnan ng mga kapitbahay ay nakita ang mag-asawa na sugatan at wala na umanong buhay. Na-recover ang isang kutsilyo at isang pamalo na hinihinalang ginamit sa krimen.

Palaisipan pa sa mga otoridad ang motibo sa krimen at patuloy ang imbestigasyon para matukoy ang salarin.