Pinasok sa bahay... Mag-asawa at anak, minasaker

ni Mai Ancheta @News | March 1, 2025

Photo: Tatlong miyembro ng pamilya ang minasaker sa loob ng kanilang bahay sa Zamboanga City. (Mai Ancheta)

Patay ang tatlong miyembro ng pamilya makaraang pagbabarilin habang nakaligtas naman ang sanggol sa Brgy. Entrada Mangga Bolong, Zamboanga City.

Kinilala ang mga biktima na mag-asawang Rodel at Jenny Espinosa, at ang 19-anyos na anak na si Jenrose.

Batay sa imbestigasyon, bigla umanong pumasok sa bahay ng mga biktima ang mga salarin pasado alas-8 ng gabi nitong Biyernes at pinagbabaril habang nagpapahinga ang mga ito.

Nagulantang ang mga kapitbahay ng biktima dahil sa sunud-sunod na putukan at makalipas ang ilang minuto ay nalaman na ng mga ito ang nangyari sa mga biktima.

Himalang nakaligtas sa insidente ang dalawang buwang sanggol na ngayo'y nasa pangangalaga na ng mga kamag-anak ng mga biktima.

Nagpapatuloy ang imbestigasyon upang matukoy ang motibo sa krimen.

Lalaki, todas sa nakapikunan

ni Angela Fernando - Trainee @News | February 1, 2024

Patay ang isang lalaki matapos na saksakin ng lalaking nakapikunan sa Tondo, Maynila.

Nahuli cam sa isang CCTV sa Sta. Catalina St., Brgy. 102 ang paghahabulan ng biktimang si Ronaldo Hipolito at ang suspek na kinilalang si Jonathan Ferrer.

Napaupo pa ang biktima matapos na saksakin ni Ferrer.

Nagkapikunan ang dalawa matapos na magtanong ang biktima sa suspek na nauwi sa pagtatalo, ayon sa Chief ng Investigation and Intelligence ng Raxabago Police Station na si Police Capt. Jayson Viola.

Umuwi pa ng bahay ang suspek matapos na humandusay ng biktima at binalikan nito si Hipolito para saksakin.

Tinamaan ang tagiliran ng biktima na agad na nadala sa ospital ngunit dead on arrival.

Ayon sa mga kamaganak ng biktima, magkakilala raw ang dalawa ngunit hindi nila alam na may alitan ang mga ito.

Naaresto si Ferrer na dati nang nakulong sa kasong frustrated murder at itinatanggi nitong sinaksak niya ang biktima.

Kinumpirma naman ng pulisya na may mga nakasaksi sa nangyaring pananaksak.

Away-trapiko... Truck driver, hinataw ng baseball bat ng rider

ni Angela Fernando - Trainee @News | January 11, 2023

Sinugod sa ospital ang isang driver ng pickup truck matapos na hatawin ng baseball bat ng isang rider na nakaalitan niya sa kalye sa Diversion Road sa Mandurriao, Iloilo.

Nakasuot ng helmet ang suspek na binuksan ang pinto ng dala-dalang pickup ng driver at pinagpapalo ang biktima.

Wala pang inilalabas na report sa kung ano ang pinagmulan ng away ng dalawa.

Nakatakas naman agad ang hindi pa nakikilalang rider.