Pinagtulungan ng 3... 61-anyos, kinatay dahil sa selos

ni Janice Baricuatro @News | September 28, 2026

Photo: File

Nasawi ang isang 61-anyos na lalaki matapos pagsasaksakin ng isang suspek habang hawak ng dalawa pa nitong kasama ang biktima dahil umano sa selos, kamakalawa sa Brgy. Queensrow Central, Bacoor City, Cavite.

Kinilala ang biktima sa alyas Danilo, 61, residente ng lugar. 

Ang pangunahing suspek naman ay si alyas Kalbo, habang kasama nito sina alyas Richard, 38, at Josie, na umano’y karelasyon ni Kalbo.

Alas-4:30 ng hapon nang magtalo sina Danilo at Kalbo dahil umano sa hinalang may gusto ang biktima kay Josie. Sa gitna ng pagtatalo, bumunot ng patalim si Kalbo habang hinawakan naman umano nina Richard at Josie ang biktima bago ito pagsasaksakin.

Matapos ang insidente, mabilis na sumakay sa motorsiklo ang tatlo at tumakas.

Hindi na naisalba ang biktima sa pagamutan. Sa follow-up operation ng Bacoor Police, naaresto si Richard habang patuloy na tinutugis sina Kalbo at Josie.

11-anyos na babae, kinatay ng nanay

by Mai Ancheta @News | September 20, 2026

Photo: FP

Patay na nang datnan ng ama ang 11-anyos na anak na babae sa kanilang bahay na may malaking sugat sa leeg sa Oton, Iloilo.

Batay sa ulat, nagtungo sa sakahan ang ama at tanging naiwan sa kanilang bahay ang asawa at dalagitang anak.

Pag-uwi sa kanilang bahay ay nadatnan na lamang ang anak na wala nang buhay at wala rin ang asawa na umano'y umuwi sa kanyang pamilya.

Pag-alis ng kanilang bahay, sinabi umano ng ina na wala na ang kanilang anak.

Isinuko ng mga kaanak ang ina sa pulisya at sa ginawang pagtatanong ay hindi umano inamin ang krimen at napansin ng imbestigador na hindi nagtutugma ang kuwento ng suspek.

Ayon kay PLt. Norbert Sipole, hepe ng Oton Police, kung may ganitong krimen, lalo na at anak ang sangkot, dapat ang unang gagawin ay humingi ng saklolo na hindi ginawa ng ina, bagkus ay umalis ito ng bahay.

Sinabi ng ama ng biktima na may problema umano sa kalusugan ang kanyang asawa matapos makunan nang dalawang beses.

Wala pang desisyon ang ama ng dalagitang nasawi kung sasampahan ng kaso ang kanyang asawa.

20-anyos, sinakal ng pamangkin, patay

ni BRT @News | September 18, 2026

Photo: Calamba City Police Station

Patay ang isang 20-anyos na babae matapos sakalin ng kanyang edad 19 na pamangkin na napikon umano sa kanilang pagtatalo sa Calamba, Laguna.

Ayon sa pulisya, galing eskwelahan, nakipag-bonding umano ang biktima sa suspek sa isang mall bago sila umuwi sa bahay ng lolo ng suspek.

Kalaunan, umalis ang pamangkin at iniwan sa kuwarto ang kanyang tiyahin na nagpapahinga umano.

Hanggang sa nakita ng lolo ng suspek ang missing person post sa social media, kaya agad siyang tumawag sa kapatid ng biktima.

Linggo ng gabi nang matuklasang wala nang buhay ang biktima.

Isinuko naman ang suspek sa pulisya ng kanyang pamilya.