Gamit ang kutsilyo at itak... PWD, kinatay ng anak ng konsehal

ni Mai Ancheta @News | August 14, 2026

Photo: FB Circulated

Himas-rehas ang anak ng isang barangay councilor matapos saksakin at tagain ng 40 beses ang isang 38-anyos na person with disability sa Brgy. Tutay, Pinamungajan, Cebu.

Ang biktima na kinilala lamang sa pangalang "Danny" ay sinasabing mayroon umanong pisikal na kapansanan.

Lumitaw sa imbestigasyon na bibili sa tindahan ang biktima nang atakihin ng suspek na si alyas Jundyl ng kutsilyo at itak.

Sinaksak umano ng suspek sa dibdib ang biktima kaya tumakbo ito, subalit hinabol pa rin at ipinagpatuloy ang pananaksak at paglaslas sa iba't ibang bahagi ng katawan na umabot sa bilang na 40.

Lasing umano ang suspek at nasa impluwensiya rin diumano ng ilegal na droga.

Inaalam pa ng pulisya kung ano ang nagtulak sa suspek para patayin sa taga at saksak ang biktima.

Sinabi ng pamilya ng biktima na wala silang alam na away sa pagitan ng dalawa.

Iniimbestigahan din ng pulisya ang isang nagngangalang “Arnel” na umano'y nang-udyok kay "Jundyl" para atakihin ang biktima.

17 yrs. old, niratrat sa comp shop

ni Mai Ancheta @News | August 13, 2026

Photo: Circulated

Patay ang isang 17-anyos na binatilyo makaraang pagbabarilin ng hindi pa nakilalang salarin sa loob ng isang computer shop sa Brgy. Sambag 1, Cebu City, Lunes ng madaling-araw.

Kinilala ng Cebu City Police ang biktima na si James Anthony Macawili.

Batay sa imbestigasyon, sinamahan ng biktima ang kaibigan nitong si “Janjan” para maglaro ng computer game.

Batay sa salaysay ng caretaker ng computer shop, pumasok sa kanilang establisimyento ang hindi nakilalang suspek na nakasuot ng face mask, naka-jacket at kulay itim na shorts at pinagbabaril si Macawili.

Batay sa kuha ng CCTV sa shop, binalikan pa umano ng suspek ang biktima para barilin ulit, subalit hindi pumutok ang baril.

Nagpapatuloy ang imbestigasyon para madakip ang salarin.

Ayaw makipagbalikan... 21-anyos, kinatay ng ex-bf

ni Jeff Tumbado @News | August 2, 2026

Photo: File

Patay ang isang 21-anyos na college student matapos pagsasaksakin ng kanyang dating nobyo sa loob ng boarding house sa Brgy. Poblacion, Sibonga, Cebu, Sabado ng umaga. 

Ayon kay Police Major Michael G. Calaurian, hepe ng Sibonga Municipal Police Station (SMPS), nagtungo umano ang suspek sa tinutuluyang boarding house ng biktima upang hikayatin itong balikan ang kanilang relasyon.

Batay sa paunang imbestigasyon, iniwan muna ng kapatid ng biktima ang dalawa upang makapag-usap nang pribado. 

Gayunman, tumanggi umano ang biktima na makipagbalikan sa suspek.

"Ang suspek, gusto makipagbalikan sa biktima, pero tumanggi siya kaya nagalit ang suspek " ayon kay Calaurian. 

Bumalik ang kapatid ng biktima sa boarding house matapos maghanap ng ekstrang susi dahil naka-lock ang silid. Pagpasok nito, nadatnan niyang nakahandusay sa loob ang biktima at ang suspek.

Sa pagresponde ng mga pulis, natagpuan ang biktima na may mga saksak sa leeg at dibdib. Idineklara siyang dead-on-arrival sa lugar ng mga tauhan ng Municipal Disaster Risk Reduction and Management Office (MDRRMO).

Samantala, nagtamo rin ng mga saksak sa leeg at dibdib ang suspek, na ayon sa pulisya ay nagtangkang magpatiwakal. 

Dinala siya sa Carcar District Hospital bago inihanda ang kanyang paglipat sa isang ospital sa Cebu City kung saan siya isinailalim sa hospital arrest.