Langis muling tumaas, komyuter at manggagawa kamot-ulo na naman

ni Leonida Bonifacio-Sison @Boses | September 12, 2026

Paigtingin pa dapat ang tulong at aksyon ng pamahalaan dahil kamot-ulo na naman ang mga manggagawa at komyuter sa problemang dulot ng patuloy na pagtaas ng presyo ng langis. 

Kapag tumataas ang presyo ng krudo at gasolina, hindi lang mga motorista ang apektado. Kasama rito ang mga empleyadong araw-araw bumiyahe, mga estudyanteng umaasa sa pampublikong transportasyon at mga pamilyang kailangang magbawas ng gastos para lamang pagkasyahin ang kanilang kita.

Dahil sa sunud-sunod na oil price hike, nagbabala ang isang transport group na magsasagawa ito ng nationwide transport strike sa Setyembre 14, 2026. Ang hakbang ay bunsod ng kanilang pagtutol sa patuloy na pagmahal ng gasolina at diesel na lalo umanong nagpapabigat sa kalagayan ng mga tsuper at operator.

Ngayong linggo, tumaas ng P4.69 kada litro ang gasolina, P5.18 ang diesel at P5.58 ang kerosene. Hindi pa rito nagtatapos ang pangamba dahil inaasahang muling tataas ang presyo ng produktong petrolyo sa susunod na linggo.

Batay sa galaw ng pandaigdigang presyo ng langis at foreign exchange mula Setyembre 7 hanggang 9, posibleng madagdagan pa ng P2 hanggang P4 kada litro ang gasolina at P3 hanggang P5 naman ang diesel. Kabilang sa mga dahilan ang tensiyon sa pagitan ng Estados Unidos at Iran at paghina ng piso laban sa dolyar.

Sa ganitong sitwasyon, hindi maiiwasang maipit ang ordinaryong Pilipino. Kapag mas mahal ang gasolina, tumataas ang gastos sa pamamasada. Kapag tumataas ang gastos ng mga operator at tsuper, maaaring maapektuhan ang pamasahe. Kapag mas mahal ang pamasahe, pagkain at iba pang bilihin, mas lumiit ang natitirang pera ng isang manggagawa.

Hindi rin dapat kalimutan ang mga komyuter na kailangang bumiyahe araw-araw para pumasok sa trabaho. Wala silang pribilehiyong manatili na lamang sa bahay kapag nagmahal ang pamasahe. Kailangan pa rin nilang pumasok para kumita at matustusan ang pang-araw-araw na pangangailangan ng pamilya.

Kaya kailangan ang malinaw at mabilis na tugon ng pamahalaan. Hindi sapat ang pagpapaliwanag kung bakit tumataas ang presyo ng langis. Kailangang may konkretong hakbang para mabawasan ang epekto nito sa transport sector at sa mga pamilyang araw-araw na naghihigpit ng sinturon.

Ang pagtaas ng langis ay hindi simpleng numero sa price board ng gasolinahan. Katumbas nito ang dagdag na gastos, dagdag na pagod at dagdag na alalahanin ng taumbayan. Sa bawat pagtaas ng presyo, dapat mas maramdaman din ang aksyon ng pamahalaan.