ni Migs Zubiri - @Solve 'Yan! | December 30, 2021
Habang marami sa atin ang masayang sumalubong sa Pasko kasama ang ating pamilya, at may handang spaghetti, fruit salad at queso de-bola, marami rin sa ating mga kababayan sa Visayas at Mindanao ang nag-Pasko sa evacuation center o sa mga bahay na unti-unti nilang sinisikap buuing muli matapos sirain ng malalakas na hangin at ulan.
Kaya nitong nakaraang linggo, personal nating sinadya ang ilan sa mga probinsiya na hinagupit ng Bagyong Odette para makapag-abot ng kaunting ayuda. Noong December 22 at 23, nagdala tayo ng dalawang libong sako ng bigas at ipinamahagi natin ito sa Iloilo Province, Iloilo City, Negros Occidental, Bacolod City, Kabankalan City, Negros Oriental, Cebu, Bohol, Agusan del Norte, Surigao del Norte, Butuan City, at Cagayan de Oro.
Nabisita natin ang mga kapatid nating nanunuluyan ngayon sa mga evacuation center, at nakita natin kung gaano kalaki ang pasasalamat nila sa munti nating tulong. Hindi man pang-Noche Buena ang ating handog, sana’y makatulong ito para lang siguraduhing hindi kakalam ang sikmura ng mga kababayan natin.
Napakahirap ng lagay nila ngayon, hindi lang dahil sa pinsala ng Bagyong Odette kundi dahil na rin sa patuloy na banta ng COVID-19. Mahirap ang social distancing at ang access sa sabon at tubig sa evacuation sites.
Kaya bilang kaunting tulong para sa sitwasyong ito, nagbigay din tayo ng 1, 200 na evacuation tents sa Negros Occidental, Negros Oriental, Cebu, at Cagayan de Oro.
Panandalian itong masisilungan ng mga kababayan nating nawalan ng tahanan dahil sa bagyo. Malalaki-laki rin ang mga tent nating ito, at kayang maipagamit sa isang pamilya para mabigyan sila ng sarili nilang espasyo sa ating evacuation sites.
Magsisilbing dagdag-layer ng proteksiyon din itong tent, na kailangang-kailangan natin para maiwasan ang pagkalat ng COVID, lalo pa’t may bagong variant na naman tayong hinaharap.
Sa pag-ikot natin sa mga probinsiyang ito, nakausap din natin ang mga opisyal sa lokal na mga pamahalaan, at napag-alaman nating malaking problema nitong Bagyong Odette ang patuloy na pag-iral ng red tape sa ating mga ahensiya.
Daing ng mga LGU official, iyon sanang agarang paglabas ng pondo o kahit ‘yung mismong pag-approve ng mga repair ng mga linya ng kuryente o kahit road clearing operations ay natatagalan dahil kailangan pang idaan sa napakaraming protocol ng gobyerno.
Sa panahon ng krisis, hindi dapat iniipit ng burukrasya ang ating emergency response.
Napakaraming buhay ang nakasalalay sa agarang aksiyon ng gobyerno.
Dati na nating hinanapan ng solusyon ang ganitong problema ng burukrasya: inakda at ipinasa ng inyong lingkod ang Ease of Doing Business and Efficient Government Service Delivery Act noong 2018. Ginawa natin ito para pabilisin ang anumang mga aplikasyon at pakikipag-transaksiyon ng mamamayang Pilipino sa ating pamahalaan. Lalo itong mahalaga sa mga emergency tulad ng Bagyong Odette.
Kailangan siguro nating aralin kung paano pa pagbubutihin ang implementasyon ng ating batas para hindi maulit ang problema sa red tape na hinaharap natin ngayon.
Maliban sa pagpapalakas ng ating anti-red tape efforts, magsusulong din tayo ng panukalang magbibigay ng supplemental budget para sa mga lugar na tinamaan ni ‘Odette’. Kailangan ito para muling makabangon ang ating mga kababayan, lalo na iyong mga nawalan ng tirahan at kabuhayan.
Muling makakaahon ang ating mga kababayan. Naniniwala ako riyan. Andito kami sa Senado, kumikilos na para magpasa ng batas para sa kakailangang pondo ng LGU para muling makabangon.
Patuloy din nating isinusulong ang panukalang bubuo ng Department of Disaster Resilience, para magkaroon na tayo ng kagawaran na tututok sa paghahanda, pagresponde, at pagbangon mula sa mga kalamidad.
Kaagapay ng ating paggawa ng mga batas, patuloy din ang pag-coordinate natin sa mga LGU para sa mga kinakailangan ng ating mga kababayan ngayon, tulad ng pagkain, tubig, gamot, diapers at sanitary items.
Kung nais niyonng mag-abot ng tulong, patuloy na tumatanggap ang iba’t ibang organisasyon ng donasyon, in cash o in kind man. Maaaring lumapit sa Philippine Red Cross sa mga numerong 0917-834-8378 o 0917-804-9230, o sa Caritas Manila sa mga numerong 0938-059-4829 o 0967-276-4806.
Mabuti ring tumawag mismo sa ating mga lokal na pamahalaan para direktang magpaabot ng tulong sa kanilang mga kinasasaklawan.
Bukas-palad nating batiin ang Bagong Taon, at patuloy nating isama sa ating mga panalangin ang mga nasalanta ng Bagyong Odette.