Lahat ng real estate brokers, dapat mag-post ng professional indemnity insurance

ni Atty. Persida Rueda-Acosta - @Magtanong Kay Attorney | July 03, 2021

Dear Chief Acosta,

Isa akong rehistradong real estate broker at pinagsabihan ako ng aking boss na siguruhing nakapag-renew ako ng aking professional indemnity bond. Ano ba ang batas tungkol dito? – Harvey

Dear Harvey,

Para sa inyong kaalaman, ang batas na sumasaklaw sa inyong katanungan ay ang Section 6 ng Republic Act No. 9646 na mas kilala bilang “Real Estate Service Act of the Philippines” na kung saan nakasaad ang sumusunod:

“Section 26. Professional Indemnity Insurance/Cash or Surety Bond. – All real estate brokers and private real estate appraisers shall, in addition to the oath referred to in the preceding section, be required to post a professional indemnity insurance/cash or surety bond, renewable every three (3) years, in an amount to be determined by the Board, which in no case shall be less than Twenty thousand pesos (P20, 000), without prejudice to the additional requirement of the client.”

Ibig sabihin, ang lahat ng real estate brokers at pribadong real estate appraisers ay dapat, bilang karagdagan sa kanilang professional oath ay kinakailangang mag-post ng professional indemnity insurance/cash o surety bond, na nararapat ma-renew bawat tatlong taon, sa halagang tinukoy ng Professional Regulatory Board of Real Estate Service, na sa anumang kaso ay hindi kukulangin sa P20, 000 na maaaring liban pa sa karagdagang hihingin ng kliyente.

Sa inyong sitwasyon, bilang isang rehistradong real estate broker at bilang karagdagan sa inyong professional oath na ginampanan ay nararapat ninyong siguruhin na kayo ay makapag-post ng professional indemnity insurance/cash o surety bond, na nararapat ma-renew bawat tatlong (3) taon, sa halagang tinukoy ng Professional Regulatory P20,000, na maaaring liban pa sa karagdagang hihingin ng kliyente.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.