Labag sa batas na ipagamit ang lisensiya sa engineering student

ni Atty. Persida Rueda-Acosta - @Magtanong Kay Attorney | June 16, 2021

Dear Chief Acosta,

Isa akong lisensiyadong metallurgical engineer, ngunit tumigil ako pansamantala sa aking pagtatrabaho. Maaari ko bang ipahiram ang aking lisensiya sa engineering student para kumita kaming pareho habang hindi pa ako nagtatrabaho? – Harold

Dear Harold,

Para sa inyong kaalaman, ang batas na sumasaklaw sa inyong katanungan ay ang Section 29(h) ng Republic Act (R. A.) No. 10688 na mas kilala bilang “Metallurgical Engineering Act of 2015” na kung saan nakasaad ang sumusunod:

“SECTION 29. Revocation or Suspension of the Certificate of Registration and Professional Identification Card and Cancellation of Temporary/Special Permit. — The Board shall have the power, upon notice and hearing, to revoke or suspend the certificate of registration and professional identification card of a registered metallurgical engineer or to cancel a temporary/ special permit granted to a foreign metallurgical engineer for violation of any of the grounds or causes provided in Section 28 of this Act, except paragraph (c) thereof, and for any of the following: xxx

(h) Aiding or abetting the illegal practice of a nonregistered and non-licensed metallurgical engineer by allowing the use of one’s certificate of registration, professional identification card or temporary/special permit; xxx”

Ayon sa nasabing batas, isa sa mga batayan sa pagkansela o pagsuspinde ng certificate of registration at professional identification card ng rehistradong metallurgical engineer ay ang pagpapagamit ng kanyang lisensiya sa indibidwal na walang lisensiya upang magpanggap na lisensiyadong metallurgical engineer. Labag sa batas ang inyong binabalak na ipagamit ang inyong lisensiya sa engineering student sapagkat tanging lisensiyadong metallurgical engineer o may permit lang ang maaaring mag-practice ng nasabing propesyon.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.