ni Madel Moratillo | June 18, 2023
Sa Hunyo 21, Miyerkules, sisimulan na ang roll out ng Bivalent COVID-19 vaccine.
Bahagi ito ng 391 libong bivalent vaccine na dumating sa bansa bilang donasyon ng bansang Lithuania.
Ayon sa Department of Health, magkakaroon ng seremonya patungkol dito sa Philippine Heart Center sa Quezon City kung saan inaasahang dadalo si Pangulong Ferdinand Marcos, Jr.
Nilinaw naman ng DOH na ang mga puwede lang magpabakuna ay healthcare workers at senior citizens na mayroon ng 2nd booster, 4 hanggang 6 na buwan na ang nakakalipas. Hinihikayat naman ng DOH ang mga puwede nang magpabakuna ng bivalent na magpaturok.
Ang bivalent vaccine ay Omicron specific vaccine pero mabisa ring pangontra sa orihinal na strain ng virus.
Tiniyak naman ni DOH Secretary Dr. Ted Herbosa na ligtas ito at epektibo.
Hinikayat din niyang samantalahin ito ng publiko habang libre pa.