Kasama ang anak, todo-pasyal… KATRINA, SUPER HAPPY SA BAKASYON GRANDE NILA NI KRIS SA TATE

ni Mercy Lejarde @Showbiz Talkies | November 13, 2026

Photo: YT Katrina Halili

SSS, as in super sa saya, ang aktres na si Katrina Halili sa naging bonding moments nila ng anak na si Katie at boyfriend na si Kris Lawrence sa kanilang US (United States) trip.

Sa kanyang social media post, ibinahagi ng aktres ang ilang larawan ng kanilang masayang pamamasyal na nagpapakita ng quality time nilang tatlo.

Ani Katrina, “One of the happiest and most memorable trips namin sa US! Sobrang saya lang na magkakasama kaming tatlo at nakagawa ng more beautiful memories together.

“Mas lalo rin naming nakita ni Katie kung gaano kasipag si Dada (Kris). Grabe, halos wala nang pahinga, pero tuluy-tuloy pa rin sa trabaho.

“Thank you, Dada, for making time for us kahit sobrang busy mo. We’re so proud of you, and we appreciate everything you do.

“More travels, more memories, and more moments like this together. Love you both!”

Well, mukhang sulit na sulit ang US trip ng tatlo. More travels and bonding moments pa. 

---

Ipinagdasal daw talaga niya…

JUDAY, WALANG PAGSISISI NA INAMPON SI YOHAN

NAGBAHAGI ang multi-awarded actress na si Judy Ann Santos sa kanyang social media post ng isang mensaheng punumpuno ng pagmamahal para sa kanyang panganay na anak na si Yohan, na nagdiwang ng ika-22 kaarawan nitong November 9.

Ani Judy Ann, “My dearest first child, born out of deep prayers and love. I have never once regretted that prayer, regardless of what. We grew up together, learning what life has to offer. But you know what? Never once have I questioned my life with you. Each experience, good and bad, is worth it. WIN.

“Life is all about learning. That’s how it’s just designed. You make mistakes and you learn from it. So wherever life takes you, mom and dad will always be here, cheering you as you spread your wings.”

In fairness, spoiled with love si Yohan, hindi lang kina Judy Ann at Ryan kundi pati na rin sa lola dearest niyang si Mommy Carol.

---

Hataw to the max din sa show abroad…

MAKI, GINAWARAN NG 6 AWARDS NG PARI

HANDA nang simulan ng OPM hitmaker na si Maki ang mas makulay na yugto ng kanyang karera sa pagpirma niya muli ng kontrata sa ABS-CBN Music, na magbubukas ng pinto sa bagong musika, concert sa loob at labas ng bansa, at iba pang kapana-panabik na mga proyekto.

Sa ginanap na Into the White: A Space for Everything Yet to Come contract signing at trade launch, inianunsiyo ng Kapamilya singer-songwriter ang mga aabangan sa kanya sa taong 2027, kasama na ang upcoming EP na KOLORCOASTER Shades at deluxe album na tatawaging KOLORCOASTER Hue.

Nagpasalamat din ang Tarsier Records artist sa tiwalang ibinigay sa kanya ng ABS-CBN at sa pagbibigay ng lakas ng loob na abutin ang kanyang mga pangarap.

“Thank you so much for all the love. Du’n naman talaga nag-start lahat, my love for music. These people came around in my life, who trusted me and gave me confidence to pursue what’s in my heart. Thank you so much, ABS-CBN Music family, for making my dreams into a reality. Kumbaga, isinulat ko na, na-sketch ko na ang drawing, kinulayan n’yo pa,” ani Maki.

Kasama sa contract signing si ABS-CBN President at CEO Carlo Katigbak, COO Cory Vidanes, head ng ABS-CBN Music and Integrated Events na si Roxy Liquigan, ABS-CBN Music Creatives, Content and Operations head Jonathan Manalo, at Tarsier Records label head at One Music Management OIC Marey Garcia.

“We love Maki. Five years ago, we met him. Nu’ng nakita pa lang namin s’ya, we knew he was for ABS-CBN Music,” kuwento ni Roxy. 

Sabi pa nito, “He’s so talented, a very good composer, songwriter, and ang maganda sa kanya, he’s very emotional, that’s why he’s writing great songs. We have so many plans for him, concerts, tours, and albums.”

Magpapatuloy ang KOLORCOASTER world tour ni Maki sa susunod na taon na tutungo sa Auckland, New Zealand, at sa Sydney, Melbourne, at Perth sa Australia sa Abril. Magkakaroon din ng US at Canada legs ang kanyang concert.

Inianunsiyo rin niya ang gagawing major concert na KOLORCOASTER: One Last Ride kasunod ng sold-out na KOLORCOASTER at KOLORCOASTER: One More Ride shows.

Bukod sa musika, aabangan din kay Maki ang lifestyle store na Kilala. Kasasabikan din ng mga fans ni Maki, na tinawag na Zushis, ang bagong collectible sa ilalim ng Kimerch, pati na rin ang official lightstick na tatawaging ‘Taladorki’.

Samantala, ginawaran naman ng Philippine Association of the Record Industry (PARI) si Maki ng anim na awards sa nasabing event: Platinum Record award para sa awiting Namumula, Double Platinum Record award para sa Kahel na Langit, Triple Platinum Record award para sa Saan?, Gold EP (extended play) award para sa Tanong, Gold Album award para sa KOLORCOASTER, at Diamond Record award para sa awiting Dilaw.

Nagsilbi ring pagkakataon ang Into the White event para handugan ni Maki ang media at trade partners ng live performance ng mga awiting Abelyana, Kahel na Langit, Luck, Habangbuhay Pansamantala, at Dilaw.

‘Yun lang, and I thank you.