ni Mercy Lejarde @Talkies | September 5, 2026
Photo: -IG _reallysharoncuneta
“No comment,” ang naging pahayag ni Megastar Sharon Cuneta nang tanungin ni Boy Abunda tungkol sa hindi pagkakaunawaan sa pagitan ng kanyang dating karelasyon na si Sen. Robin Padilla at ng kanyang asawang si Sen. Kiko Pangilinan sa Senado.
Sa panayam sa Fast Talk with Boy Abunda (FTWBA), tinanong ng King of Talk si Sharon kung nakita niya ang mga memes (nakakatawang larawan o posts sa internet) na kumalat online kaugnay ng insidente at kung ano ang naging reaksiyon niya rito.
“Nu’ng ‘di nagkaunawaan sina Kiko at Binoy, si Sen. Robin Padilla, sa Senado, alam mo, ang daming memes na lumabas. Nakita mo ang iba? Natawa ka, nagalit ka?” tanong ni Boy.
“No comment,” sagot ni Sharon.
Sinundan naman niya ito ng pabirong pahayag na, “Ganito na lang, ‘Uy! Ex ko (Robin). Uy, husband ko.’ Tapos na!”
Dagdag pa niya, “Stop there. No, I don't want to comment because sa amin, it was a non-issue.”
Well, big tumpak naman si Sharon sa hindi niya pagkokomento sa nasabing isyu, dahil minsan ay minahal din niya si Sen. Robin.
Pak, ganern!
Parokya ni Edgar vocalist, kinanta ang Huling El Bimbo ng E-heads… CHITO AT ELY, NAG-JAMMING SA SHOW SA DUBAI
IBINAHAGI ng singer-songwriter at lead vocalist ng Parokya ni Edgar na si Chito Miranda ang kanyang naging saya matapos makipag-jam kasama ang lead vocalist ng Eraserheads na si Ely Buendia sa isang concert sa Dubai.
Sa kanyang social media post, ikinuwento ni Chito kung gaano siya kasaya sa naging pagtatanghal, lalo na nang makasama niya si Ely sa huling bahagi ng set ng Eraserheads.
“Ang saya lang, eh. Sobrang saya ng gig, super-solid ‘yung crowd, tapos sobrang saya ko pa kasi nakapag-jam kami ni Ely sa last song ng napakasayang set nila,” ani Chito.
Ayon kay Chito, makikita rin sa isang video kung gaano sila kasaya matapos nilang bumaba ng stage.
Ngunit ibinahagi rin niya na muntik nang hindi matuloy ang kanilang collaboration dahil pareho silang nag-aalangan na makaabala sa isa’t isa.
Aniya, hiniling ng mga producers kung maaari silang mag-jam sa dulo ng show.
Gayunman, una itong tinanggihan ni Chito dahil nahihiya siyang manggulo sa set ng Eraserheads. Si Ely naman ay ayaw umanong manatili si Chito sa venue nang halos isang oras at kalahati matapos ang kanyang set para lamang sa kanilang jam.
“Kumbaga, ayaw lang naming pareho makaabala. We were both simply being considerate,” ani Chito.
Kalaunan, kinausap umano sila ni Diane, manager at co-producer ni Ely, at nalaman nilang pareho naman pala silang bukas sa ideya.
Agad pumayag si Chito dahil kabisado niya ang kantang Ang Huling El Bimbo.
Pumayag din si Ely at naisip niyang magiging kakaiba para sa audience kung kalahati ng kanta ay si Chito ang aawit.
Nagkaroon muna sila ng maikling rehearsal o soundcheck bago ang kanilang aktuwal na pagtatanghal.
Sa huli, nagpasalamat si Chito sa mga dumalo sa concert sa Dubai at muling ipinahayag kung gaano siya kasaya sa pagkakataong makapag-jam sila ni Ely.
“Sobrang salamat, Dubai. As I said, ang saya nu’n,” pagtatapos ni Chito.
Well, sure si yours truly na marami rin ang napasaya nina Ely at Chito sa kanilang bonggang-bonggang Pinoy jam sa Dubai.
Boom! Panalo!
Video, ipinost ni Zoren… CARMINA, TODO-ENJOY SA PAGBA-VACUUM SA BAHAY
SUPER-CUTE ang aktres na si Carmina Villarroel sa ibinahaging video clip ng kanyang loving husband na si Zoren Legaspi sa Instagram (IG) na nagpapakita sa simple at masayang buhay ni Carmina sa kanilang tahanan.
Ayon kay Zoren, tila isa sa mga paboritong gawain ni Carmina ang pagba-vacuum araw-araw.
Aniya, “Simpleng buhay ni @mina_villarroel. Gusto lang n’yang makapag-vacuum every day. Kung sa mga cleaning products, kay @mina_villarroel ako magpapa-review.”
Samantala, nag-iwan din ng komento sa post ang kanilang anak na si Mavy Legaspi.
Sey ni Mavy, “Vacuum. Lego (Let’s go). Workout. Repeat.”
Sinagot naman ito ni Carmina at sinabing, “@mavylegaspi Yeah. My daily routine. Vacuum, Lego, workout, repeat.”
In fairness kay Carmina, kahit simpleng pagba-vacuum lang ay flawless at maganda pa rin talaga siya. Kitang-kita rin kung gaano siya kasaya bilang wife.
‘Yun lang, and I thank you.
