Iba ang ganda ng dyosa! WAX FIGURE NI ANNE SA HK, PINIPILAHAN NG MGA FOREIGNERS

ni Mercy Lejarde @Showbiz Talkies | October 17, 2026

Photo: IG _annecurtissmith

Inamin ng multi-awarded host na si Valerie Tan sa presscon ng I Heart PH na na-starstruck siya sa wax figure ng aktres na si Anne Curtis.

Sa panayam, napag-usapan ang magagandang lugar at kakaibang karanasang tampok sa programa niya na nagpapakita ng travel na puno ng kultura, entertainment, pagtuklas at masasarap na pagkain.

Isa sa mga destinasyong tampok sa programa ang Hong Kong Palace Museum, na may mga modernong gallery at koleksiyon ng mga artifacts, seramika, painting at iba pang likhang-sining na nagpapakita ng kasaysayan at mga tradisyon ng China.

Sa Madame Tussauds Hong Kong naman, maaaring makita nang malapitan ang mga makatotohanang wax figure ng mga sikat na personalidad mula sa mundo ng pelikula, palakasan, musika, pulitika at pop culture.

Kabilang sa mga Pinoy celebrities na may wax figure rito sina boxing champion Manny Pacquiao, Miss Universe 2015 Pia Wurtzbach, Miss Universe 2018 Catriona Gray, aktres at TV host Anne Curtis, at box-office star Kathryn Bernardo.

Sa panayam, tinanong si Valerie tungkol sa kanyang karanasan nang makita nang malapitan ang mga wax figure ng mga Pilipinong personalidad.

“I was so amazed kasi ang galing talaga ng pagkakagawa. It was so, so realistic. I was able to go up close, pati parang texture ng skin, hair, anything, parang I was starstruck kahit alam kong wax sila. And then, na-starstruck din ako sa ganda ng dyosa na si Anne Curtis.

“Nakakatuwa, alam n’yo ba na ang daming foreigners na nagpapa-picture din kina Catriona Gray at Anne Curtis, so parang nakaka-proud din kasi kilala nila ang mga Pinoy celebrities,” sey ni Valerie.

Samantala, produced ng TV8 Media Productions ang multi-awarded travel at lifestyle show na I Heart PH, na magbubukas na ng Season 11 sa October 25, Linggo, ganap na 11:30 ng umaga sa GTV.

---

Kapansanan, ‘di raw dapat pinagtatawanan…

ANAK NI MARK, TODO-TANGGOL AT SUPORTA RIN KAY JOSHUA

NAGPAHAYAG ng suporta kay Joshua Aquino si Ronin Leviste, anak ni former Batangas Vice-Governor Mark Leviste, kasunod ng kontrobersiya sa podcast na Machong Chismisan.

Ayon kay Ronin, kilala niya ang tunay na pagkatao ni Joshua at nakalulungkot na ginagawang katatawanan ang kapansanan ng iba para lang sa content.

“I stand by Kuya Josh, not just because he’s a close friend, but because I know the person he is beyond what people say about him. Nakakalungkot at nakakadismaya na may mga taong ginagawang katatawanan ang kapansanan ng iba para lang sa content. 

“Ang pagkakaroon ng platform ay may kaakibat na responsibilidad, at ‘di dapat isinasakripisyo ang dignidad ng isang tao para sa views, likes, o tawanan. 

“‘Di lahat ng puwedeng gawing biro ay dapat pagtawanan, lalo na kung ang kapansanan ng kapwa ang ginagawang punchline,” pahayag ni Ronin.

Dagdag pa niya, isang mabuting tao at blessing si Joshua sa mga taong nakakakilala sa kanya.

Aniya, “Kuya Josh is a bundle of joy and a blessing to everyone who knows him. Sa mga taong tunay na nakakakilala sa kanya, alam namin kung gaano s’ya kabuti at kung gaano karaming tao ang napapasaya n’ya sa simpleng paraan. 

“Madasalin, mabait, mahal ang ating bansa, at marami pang iba— ‘yan si Kuya Josh. Walang taong perpekto, pero walang sinuman ang dapat maliitin dahil lamang sa kanyang kapansanan. Kuya, hindi ka nag-iisa. Nandito kami para sa ‘yo, always.”

Anyway, we love you, Joshua!

---

Galawang artista rin…

ANAK NI MEGAN, MAHILIG MAG-FLYING KISS

BONGGANG bakasyon sa Italy ang ganap ng aktres-beauty queen na si Megan Young kasama ang mister niyang aktor na si Mikael Daez at ang kanilang anak na si Baby Leon.

Sa social media, ibinahagi niya ang mga larawan ng kanilang unang long-haul trip.

“Philippines to Italy. Our first long haul trip together!” sey ni Megan.

Ibinahagi rin niya ang kanilang mga ganap sa biyahe, mula sa pagdating nila sa Milan at pagpunta sa Verona para mag-lunch at magkape, hanggang sa pag-explore sa Dolomites.

Ayon kay Megan, nag-stay sila sa isang magandang apartment para makapagluto ng sarili nilang pagkain at magkaroon ng mas maluwag na space para kay Baby Leon.

“First stop, coffee!!! After arriving in Milan, we drove to Verona for lunch and some coffee,” kuwento pa niya.

Tuwang-tuwa rin si Megan sa anak nila, na mahilig bumati sa mga tao at nagbibigay ng flying kiss kapag nagpapaalam.

Hmmm… mukhang future artista si Baby Leon sa taglay na kaguwapuhan at karisma, ha?

‘Di raw “walang kuwenta”... JOSHUA, TODO-GASTOS NG SARILING PERA PARA SA MGA KASAMBAHAY

ni Mercy Lejarde @Showbiz Talkies | October 15, 2026

Photo: IG _krisaquino

Sabay-sabay na nagpahayag ng saloobin sa social media ang mga taong nakakakilala at nagmamahal kay Joshua Aquino, panganay na anak ng Queen of All Media na si Kris Aquino, matapos makatanggap ng hindi magandang komento mula sa mga hosts ng comedy podcast na Machong Chismisan.

Isa sa mga nagpahayag ng suporta kay Joshua ang host na si Darla Sauler, na kilala rin bilang head writer at resident sidekick ni Kris sa dating sikat na ABS-CBN morning talk show na Kris TV.

Sa kanyang mensahe, ipinahayag ni Darla ang pagmamahal at paghanga kay Joshua at ibinahagi kung paano niya nasaksihan ang pagiging maalalahanin at mapagmahal nito sa mga taong nakapaligid sa kanya.

Pahayag ni Darla, “I love you, Kuya Josh!

“You are one of the kindest, most thoughtful, and most generous people I know. Mula pagkabata, witness na ‘ko kung paano mo alagaan si Mama (Kris) at si Bimb sa paraang alam mo, at kung paano mo rin alalahanin ang lahat ng tao sa paligid mo.

“Kung alam lang ng lahat kung gaano mo laging iniisip ang kapakanan ng ibang tao, kung paano mo gustong masaya ang lahat, at kung gaano ka kasaya ‘pag may napapasaya ka.

“Sa lahat ng naging lakad natin, I honestly can’t remember a time na umuwi ka nang walang dalang pasalubong para sa ibang tao. The driver, the angels sa bahay, the nurse, the teachers, si Bimb, si Mama—lahat! 

“You always think of everyone. Du’n nga madalas napupunta ang allowance mo, eh! You would rather spend it making other people happy than spend it on yourself.

“And that, to me, says so much about the person you are.

“Kaya lahat ng tunay na nakakakilala sa ‘yo, bilib sa ‘yo at mahal na mahal ka. Because we see your heart. We see your kindness. And we know that you have so much love to give.

“I love you always, Kuya Joshy. Keep that beautiful heart of yours. The world needs more people like you.”

Samantala, nagpahayag din ng saloobin si Dindo Balares, dating entertainment editor at malapit na kaibigan ni Kris Aquino. Kinuwestiyon niya ang panlalait kay Joshua at binigyang-diin na hindi kilala ng mga nagbigay ng negatibong komento ang tunay na pagkatao nito.

Ani Dindo, “Ano’ng sukatan ng mga taong walang kuwenta? Kung may nilalait at pinagkakatuwaan ba tayong kapwa na may disability, tayo ang kahanga-hanga at wala nang kuwenta ang taong ginagawa nating katatawanan?

“Maraming netizens na nagmamalasakit na nagpapadala sa ‘kin ng link ng ilang kalalakihan na tinawag na walang kuwenta si Kuya Josh, ang panganay ni Kris Aquino.

“Walang idea ang mga lalaking ‘to kung sino si Kuya Josh, pero hintayin nila kung sinu-sino pa ang mga nagmamalasakit at nagmamahal sa kanya.

“Ang mga tao at pamilyang ‘to ang ‘di naisusulat o naiuulat na kusa o boluntaryong kumukupkop at nag-aalaga kay Kuya Josh tuwing nasa ibang bansa at nagpapagamot ang kanyang Mama Kris at ayaw n’yang bumiyahe. Gentle giant at pinalaking magalang at mapagmahal si Kuya Josh, kaya paborito s’ya ng kanilang mga kaibigan at pamilya.

“Maging kami ng pamilya ko, nakahanda ring mag-alaga sa kanya anumang oras o panahon.

“Umiiwas pa sa sobrang stress si Kris, kaya marami s’yang pinapalampas na mga isyu para sa pagbuti ng kanyang iniindang karamdaman.

“Alam na ng lahat na matitiis n’ya ang kahit na anong lait sa kanya, pero ‘wag mo lang kakantiin ang kanyang mga anak.

“Lahat ng ina sa kahit na anong species ng animal kingdom, ‘pag kapakanan na ng anak ang nakasalalay, makakakita ka ng pangil.

“Pero bilang isa sa mga nagmamahal sa mag-iina, sana’y ipaubaya na lamang muna ito ni Kris sa kanyang mga abogado.”

Bukod kina Darla at Dindo, nagpahayag din ng suporta kay Joshua ang showbiz vlogger na si Loi Villarama, o mas kilala bilang Mama Loi, na co-host ni Ogie Diaz sa digital talk show na Showbiz Update sa YouTube (YT).

Sa kanyang social media post, iginiit ni Mama Loi na may halaga si Joshua at hindi nararapat na maliitin ang kanyang pagkatao.

Ani Mama Loi, “MAY KUWENTA SI KUYA JOSHUA! Dahil pinalaki silang dalawa ni Bimb ng mama nila na si Ms. @krisaquino na may takot sa Diyos, may pagmamahal sa puso at paggalang sa kapwa.

“His heart is pure. He prays all the time. At never s’yang mangyuyurak ng ibang tao! At ‘di s’ya nakatunganga lang! He is very happy taking care of his mama.

“Kaya mas may kuwenta pa si Kuya Joshua compared sa ibang tao na masama ang budhi at bulok ang pag-iisip.”

Tumpak ka r’yan, Mama Loi. Mahal ng madlang people si Kuya Joshua.

‘Yun lang, and I thank you.

Aktor, kahit may dyowa… JOSHUA, UMAMING SPECIAL SA KANYA SI JULIA

ni Mercy Lejarde @Showbiz Talkies | October 15, 2026

Photo: Julia Barretto at Joshua Garcia - IG

Ibinulgar ng aktor na si Joshua Garcia na may special place sa puso niya ang aktres na si Julia Barretto.

Sa panayam sa YouTube (YT) channel ni Benedict Cua, nagbahagi ang aktor ng kanyang pananaw tungkol sa love team at kung mayroon bang partikular na kapareha na pinagsisihan niyang makapareha.

“No,” mabilis na sagot ni Joshua.

Paliwanag niya, “Ang saya ng love team, dude. It’s a journey. You get to experience something na napapanood mo lang. Kasi my first sa sinehan, KathNiel (Kathryn Bernardo at Daniel Padilla), ‘yun ang first ko na mag-sine talaga, na napanood ko. Ang saya rin ng love team, ang dami mong matututunan.”

“Pero mas masaya if you are like John Lloyd (Cruz) na you get to be paired with anyone,” dagdag pa niya.

Napag-usapan din nila ang pagiging intense ng mga Pinoy pagdating sa love team.

“Yes, alam mo naman tayong mga Pilipino, mapagmahal tayo,” sey ni Joshua.

Aniya, bahagi ng journey ng isang artista ang pagkakaroon ng love team na dapat yakapin at pahalagahan.

“Hindi, not at all. It’s part of your job, it’s part of your journey. You have to embrace it. ‘Di lahat nabibigyan ng ganyang (pagkakataon), like me, with Julia,” paliwanag ng aktor.

Nang tanungin naman tungkol sa relasyon niya sa aktres, nakangiting sagot ni Joshua, “I love Julia, may special place s’ya sa aking puso.”

Samantala, tinanong din siya ni Benedict kung nakasasama ba sa career ng isang artista ang pagkakaroon ng karelasyon.

“Hindi. For as long as alam mo ‘yung ginagawa mo and you are professional pa rin sa craft mo, passion mo pa rin s’ya,” sagot ni Joshua.

Inamin din ng aktor na kasalukuyan siyang may non-showbiz girlfriend at hindi ito hadlang sa kanyang trabaho.

“I’m in a relationship right now, non-showbiz. (Ang) Ginagawa ko lang ay 100% sa work ko. And ‘yun na rin ‘yung ginagawa ko kasi bago pa naging kami. So, parang kahit ano pang gawin ko r’yan sa work ko, ‘di naman talaga s’ya magagalit,” dagdag niya.

Ang tinutukoy ni Joshua na non-showbiz girlfriend ay ang French-Filipina athlete at golfer na si Emilienne Vigier.

---

‘Di alam na buntis, magbabakasyon lang sana…

MISIS NI NIKKO, MAY ECTOPIC PREGNANCY, BIGLANG NAOPERAHAN SA SINGAPORE

MASAYANG birthday celebration sana sa Singapore ang bonding ng pamilya ng aktor na si Nikko Natividad, kasama ang kanyang misis at mga anak, pero nauwi sa matinding pag-aalala ang kanilang biyahe matapos isugod sa emergency room si Cielo.

Sa kanyang social media post, ikinuwento ni Nikko na hindi nila alam na anim na linggo nang buntis ang kanyang misis at kinailangan itong operahan agad matapos matuklasang may ectopic pregnancy.

“Pumunta kami ng Singapore para mag-celebrate ng birthday ni misis. Isinugod s’ya sa ER (emergency room). ‘Di namin alam na 6 weeks na pala siyang pregnant. Wala kaming choice kundi ipaopera s’ya agad-agad dito dahil delikado raw at may ectopic pregnancy s’ya. Nakakalungkot dahil s’yempre, nawalan kami ng anak.

“Pero ang dasal ko ngayon, maging okay si wife. Six hours na, ‘di pa rin siya lumalabas sa operating room. Sa mga kaibigan, pamilya namin, we need your prayers,” saad ni Nikko.

Anyway, get well soon, Cielo. Praying for your speedy recovery.

---

MAKAKASAMA ang mga pinakamalalaking stars at mga bagong talents sa bansa sa mas pinahabang concert experience ng ASAP XP, na mapapanood na sa Sunday primetime mula 7 PM hanggang 8:45 PM simula October 18, hatid ang mas maraming kantahan, sayawan at kilig.

Sabay-sabay itong mapapanood sa ALLTV2, TV5, A2Z, Kapamilya Channel, at Kapamilya Online Live sa Facebook (FB) at YouTube (YT). Available din ang programa sa iWant at TFC.

Matapos pasayahin ang mahigit 8,000 Cabalen sa back-to-back shows sa Pampanga, tuloy ang saya sa ASAP XP sa pasabog na opening number mula kina Ogie Alcasid, Piolo Pascual, Erik Santos, Bamboo, Belle Mariano, Robi Domingo, Alexa Ilacad, Maymay Entrata, Kai Montinola, AC Bonifacio, Jane de Leon at Darren Espanto, kasama sina Dylan Menor, Carmela Lorzano, Gianna Huelgas, Selina Griffin, Kaitlyn King, Chan Martin, Celyn David, Keisha Serna, Nico Matugas, Patrick Ballesteros at Spencer Capistrano.

May hatid namang kilig ang performances ng The Loyalty Game stars na sina Jericho Rosales at Janine Gutierrez, at ang Always Yours, Never Mine stars na sina Joshua Garcia at Julia Barretto.

Makibirit naman kasama ng TNT (Tawag ng Tanghalan) Divas na sina Carmelle Collado, Lyka Estrella, Arvery Love Lagoring at Marielle Montellano, New Gen Divas na sina Alexa Ilacad, Kai Montinola, Esang De Torres at Elha Nympha, at TV5 Divas na sina Kaitlyn, Selina, Gianna at Carmela. 

Makikisaya rin ngayong Linggo sa ASAP XP ang OPM band na Aegis.

Huwag ding palampasin ang reimagined version ni Ogie Alcasid ng Nandito Ako at ang bonggang collab niya kina Carmelle at Elha. 

Makisaya naman sa dance number ng love teams na sina Seth Fedelin at Francine Diaz, Alexa at Gelo Rivera, Kai at Jarren Garcia.

‘Yun lang, and I thank you.