Karapatan sa suportang pinansiyal mula sa empleyado ng gobyerno

ni Atty. Persida Rueda-Acosta - @Magtanong Kay Attorney | October 09, 2021

Dear Chief Acosta,

Ako ay kasal sa opisyal ng militar at kami ay may anak na edad 16. Hindi na kami nagsasama ng aking asawa at hindi rin siya nagbibigay ng suportang pinansiyal para sa anak namin. Maaari ba ako magtungo sa tanggapan ng Armed Forces of the Philippines (AFP) upang makiusap na makakuha ng bahagi ng kanyang suweldo bilang suporta sa aming anak? – Maricar

Dear Maricar,

Ang mga batas na sumasaklaw tungkol sa inyong katanungan ay ang Republic Act No. 9262, o ang Anti-Violence Against Women and Their Children Act of 2004. Nakasaad sa Section 8 (g) ng nasabing batas na:

“(g) Directing the respondent to provide support to the woman and/or her child if entitled to legal support. Notwithstanding other laws to the contrary, the court shall order an appropriate percentage of the income or salary of the respondent to be withheld regularly by the respondent’s employer for the same to be automatically remitted directly to the woman. Failure to remit and/or withhold or any delay in the remittance of support to the woman and/or her child without justifiable cause shall render the respondent or his employer liable for indirect contempt of court.” (Binigyang-diin)

Kaugnay nito, inilahad ng Korte Suprema sa kaso ng Pension and Gratuity Management Center et al. vs. AAA (G.R. No. 201292, August 1, 2018, Ponente: Honorable former Associate Justice Mariano C. Del Castillo), ang sumusunod:

“Section 8(g) of RA 9262 used the general term ‘employer,’ which includes in its coverage the military institution, S/Sgt. Yahon’s employer. Where the law does not distinguish, courts should not distinguish. Thus, Section 8(g) applies to all employers, whether private or government.”

Sa inyong sitwasyon, hindi maaari na kayo mismo ang dumulog sa tanggapan ng Armed Forces of the Philippines, na siyang employer ng inyong asawa, upang hilingin ang bahagi ng kanyang suweldo. Marapat na kayo ay magsampa ng kaukulang kaso sa korte, sa kadahilanang ang korte lamang ang maaaring mag-utos sa employer na itabi ang bahagi ng kanyang suweldo at ibigay ito sa inyo bilang suportang pinansiyal.

Nawa ay nasagot namin ang inyong mga katanungan. Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa isang abogado.

Maraming salamat sa inyong patuloy na pagtitiwala.