Karapatan ng pribadong manggagawa tungkol sa safety standards

ni Atty. Persida Rueda-Acosta - @Magtanong Kay Attorney | August 19, 2021

Dear Chief Acosta,

Natanggap ang asawa ko bilang manggagawa sa pribadong construction firm. Unang trabaho pa lamang niya ito sa industriya na iyon kaya’t marami pa siyang hindi alam o gamay. Naiisip na niyang tanungin ang kinauukulan sa kanilang kumpanya tungkol sa safety standards, ngunit hindi niya alam kung may karapatan ba siyang alamin iyon? Kung sakali rin bang magkaroon ng aksidente sa kanilang trabaho, karapatan niya bang ipaalam iyon sa kinauukulan? – Tina

Dear Tina,

Malaking bahagi ng pag-unlad ng lipunan ay dahil sa sipag at pagpupunyagi ng bawat manggagawa. Kaya ang kanilang kapakanan ay isa sa mga pangunahing pinangangalagaan.

Ang isa sa mga batas na nagbibigay ng kaukulang karapatan sa pribadong manggagawa ay ang Republic Act No. 11058 (An Act Strengthening Compliance with Occupational Safety and Health Standards and Providing Penalties for Violations Thereof). Sa ilalim ng nasabing batas ay binibigyan ng karapatan ang mga pribadong manggagawa na malaman ang mga posibleng panganib sa kanilang trabaho pati na rin ang mga safety standards na dapat nilang sundin. Partikular na nakasaad sa naturang batas ang sumusunod:

“Section 5. Workers’ Right to Know. - The right to safety and health at work shall be guaranteed. All workers shall be appropriately informed by the employer about all types of hazards in the workplace, provided access to training and education on chemical safety, electrical safety mechanical safety, and ergonomical safety .x x x

Section 11. Occupational Safety and Health Information. - Workers in all establishments, projects, sites and all other places where work is being undertaken shall be provided adequate and suitable information by the employer, contractor or subcontractor, if any, on safety and health hazards, and the appropriate measures, including the probable location of workers, for the prevention, control and protection against those hazards.”

Sa hindi naman inaasahang pagkakataong magkaroon ng aksidente sa trabaho, karapatan ng pribadong manggagawa na ipaalam ito sa kanilang employer, sa Department of Labor and Employment (DOLE), at sa mga akmang ahensiya. Alinsunod sa probisyon ng R. A. No. 11058:

“Section 7. Workers' Right to Report Accidents. Workers and their representatives shall have the right to report accidents, dangerous occurences, and hazards to the employer, to the DOLE and other concerned government agencies exercising jurisdiction as the competent authority in the specific industry or economic activity.”

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.