Karapatan ng naiwan na pamilya na makuha ang mga labi at death certificate

kahit hindi pa fully paid sa ospital.

ni Atty. Persida Rueda-Acosta - @Magtanong Kay Attorney | September 10, 2021

Dear Chief Acosta,

Ang ama ko ay namatay sa ospital kung saan ang kanyang hospital bill ay umabot ng mahigit P100, 000 kahit na siya ay naka-admit sa kanilang ward lamang. Nais na namin kunin ang mga labi ng aking ama, at maging ang kanyang death certificate upang siya ay maipalibing na namin, ngunit hindi pumayag ang ospital. Sinabi ng empleyado ng ospital na kinakailangan diumano muna naming magsumite ng promissory note bago makuha ang mga labi at death certificate ng aking ama. Maaari ba iyon? - Kyra

Dear Kyra,

Ang mga batas na sasaklaw tungkol sa inyong katanungan ay ang Republic Act No. 9439 o ang ACT PROHIBITING THE DETENTION OF PATIENTS IN HOSPITALS AND MEDICAL CLINICS ON GROUNDS OF NONPAYMENT OF HOSPITAL BILLS OR MEDICAL EXPENSES, at ang kaukulang Implementing Rules and Regulations nito. Nakasaad sa Section 2 ng batas na ito ang sumusunod:

“SEC. 2. Patients who have fully or partially recovered and who already wish to leave the hospital or medical clinic but are financially incapable to settle, in part or in full, their hospitalization expenses, including professional fees and medicines, shall be allowed to leave the hospital or medical clinic, with a right to demand the issuance of the corresponding medical certificate and other pertinent papers required for the release of the patient from the hospital or medical clinic upon the execution of a promissory note covering the unpaid obligation. The promissory note shall be secured by either a mortgage or by a guarantee of a co-maker, who will be jointly and severally liable with the patient for the unpaid obligation. In the case of a deceased patient, the corresponding death certificate and other documents required for interment and other purposes shall be released to any of his surviving relatives requesting for the same: Provided, however, That patients who stayed in private rooms shall not be covered by this Act.” (Binigyang-diin)

Nakasaad din sa Implementing Rules and Regulations ng nasabing batas na:

“V. Policies and Guidelines:

A. General Policies: xxx

1. In the case of a deceased patient, any of his/ her surviving relatives who refuse to execute a promissory note shall be allowed to claim the cadaver and can demand the issuance of death certificate and other pertinent documents for interment purposes. Documents for other purposes shall be released only after execution of a promissory note. xxx clinic refusing to release the cadaver for reason of nonpayment, in part or in full, of hospital bills or medical expenses/ hospitalization expenses shall be held accountable for such unlawful act. xxx”

Alinsunod sa nabanggit na probisyon ng batas at kaakibat nitong Implementing Rules and Regulations, maaari ninyong makuha ang mga labi at ang death certificate ng inyong yumaong ama upang siya ay maipalibing, kahit na kayo ay hindi magbigay ng promissory note kaugnay sa kanyang naiwang bayarin sa ospital. Ang pagbibigay ng promissory note kaugnay sa pagkuha ng death certificate ay kinakailangan lamang kung ang nasabing death certificate ay gagamitin sa ibang layunin, liban sa pagpapabalibing sa taong yumao. Nakasaad din sa nabanggit na panuntunan na ang anumang ospital o medical clinic na tatangging ibigay ang mga labi ng taong yumao, sa kadahilanan ng mga naiwang bayarin sa nasabing ospital o medical clinic ay mananagot sa batas.

Nawa ay nasagot namin ang inyong mga katanungan. Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa isang abogado.

Maraming salamat sa inyong patuloy na pagtitiwala.