Karapatan ng mga magulang na huwag pamanahan ang suwail na anak

ni Atty. Persida Rueda-Acosta - @Magtanong Kay Attorney | August 30, 2020

Sa ating batas ay pinasiguruhan ang karapatan ng anak na magmana sa kanyang mga magulang. Anuman ang estado nito, lehitimo man o hindi lehitimo ay mayroon siyang kaakibat na karapatan na magmana sa kanyang mga magulang. Subalit, kaugnay ng karapatang ito ay ang karapatan din ng magulang na hindi pamanahan ang kanyang anak kapag ito ay suwail at nakagawa ng krimen laban sa kanyang sariling mga magulang. Marapat lamang na masunod ang sinasabi ng batas tungkol sa “disinheritance” upang ito ay kilalanin ng ating mga hukuman.

Kapag ang magulang ay nais na hindi bigyan ng mana ang kanyang anak ay maaari niyang gawin ito nang naaayon sa nakasaad sa batas at babanggitin niya sa kanyang huling testamento ang mga dahilan kung bakit niya hindi binigyan ng mana ang anak na kanyang binabanggit sa ilalim ng Article 919 ng Civil Code of the Philippines kung saan nakasaad na:

“Art. 919. The following shall be sufficient causes for the disinheritance of children and descendants, legitimate as well as illegitimate:
(1) When a child or descendant has been found guilty of an attempt against the life of the testator, his or her spouse, descendants, or ascendants;
(2) When a child or descendant has accused the testator of a crime for which the law prescribes imprisonment for six years or more, if the accusation has been found groundless;
(3) When a child or descendant has been convicted of adultery or concubinage with the spouse of the testator;
(4) When a child or descendant by fraud, violence, intimidation, or undue influence causes the testator to make a will or to change one already made;
(5) A refusal without justifiable cause to support the parent or ascendant who disinherits such child or descendant;
(6) Maltreatment of the testator by word or deed, by the child or descendant;
(7) When a child or descendant leads a dishonorable or disgraceful life;
(8) Conviction of a crime which carries with it the penalty of civil interdiction. (756, 853, 674a)”

Ang magulang ay maaaring gumawa ng kanyang Last Will and Testament kung saan maaari niyang isaad dito ang kanyang pagnanais na pawalan ng mana ang kanyang suwail na anak at ang isa sa mga dahilang nabanggit sa itaas ay maaari niyang gamiting basehan.