JESSY KAY LUIS: KAHIT TUYO NA LANG KAININ NATIN, GAGAWIN KO LAHAT PARA SA 'YO

ni Julie Bonifacio - @Winner | November 29, 2021

Keri pa rin ni Jessy Mendiola na tumanggap ng mga challenging roles sa pelikula at telebisyon except ang makipag-kissing scene.

Agad nilinaw ni Jessy sa amin na hindi ang kanyang mister na si Luis Manzano ang dahilan ng pagtanggi niya sa kissing scene.

“Nu'ng nag-Sandugo ako, nag-stop na ako mag-kissing scenes. Okay lang na may sexy scenes or love scenes, it’s okay, it’s part of it.

“But 'yung kissing scenes lang talaga, parang for me kasi, nu'ng nabalitaan ko 'yung COVID, ano kasi, I’m very praning. I’m paranoid. So, medyo may pagka-hypochondriac ako. 'Pag may nababalitaan akong ganu'n or kunwari, may isang bagay na gagawin ko after, iisipin ko siya nang iisipin.

“So, para sa akin, para iwas-stress at iisipin, nagsabi na ako, naging honest ako na I prefer not to do kissing scenes.”

Wala raw kaisyu-isyu kay Luis sa mga naging leading men ni Jessy.

“Actually, kaibigan na niya halos lahat ng naging leading men ko,” ngiti ni Jessy. “So, para wala naman siyang problema sa ganu'n. Nu’ng Girl in an Orange Dress nga, kinilig siya sa amin ni Echo (Jericho Rosales). Sabi niya, ‘Love, alam mo, kinikilig ako sa inyo!’ Sinabi niya 'yun, eh. Tapos, ilang beses pa niyang pinanood ‘yung movie.”

Inamin naman ng bagong Cathy Valencia Advanced Skin Care ambassador na marami raw nabago sa kanya when she got married especially sa kanyang fashion style.

“Oh yes. (Before) I never wore pink. But now, my bag (Hermes) is pink. I’m wearing pink.

Parang nasabi ko, ‘Parang naging mas maarte ako,” natatawang kuwento ni Jessy.

“But I think it comes with maturity. I used to be boyish kasi. I used to wear rubber shoes lang and there’s nothing bad du'n, 'di ba? I have nothing against it. Lagi lang ako naka-T-shirt at jeans. But then as you grow older, nagkakaroon ng maturity.”

Kung maraming nabago kay Jessy bilang misis, meron din daw kay Luis.

“Mas naging relaxed siya. When Lu and I broke up, para siyang nagmamadali. Nagmamadali siya in life. Sa trabaho, sa businesses, parang hindi siya maka-slow down.

“It’s more of wala na siyang time for himself. Wala na siyang time magpahinga. Kaya rin siya medyo na-stress nu'n, eh, kasi sabay-sabay 'yung pandemic at ABS-CBN closure. So, lagi siyang nagmamadali, marami siyang ginagawa.

“Tapos, finally, when we got married, I told him, ‘Alam mo, Love, you have to slow down.

You’re not getting any younger. You have to take care of your health. You have to prioritize what you want for yourself. You’re okay na, eh. And kahit pa mawala lahat 'yan, huwag ka mag-alala, aalagaan kita.’

"Sabi ko, ‘Kahit pa tuyo ang kainin natin everyday, basta uminom lang tayo ng madaming tubig, gagawin ko lahat para sa ‘yo.’

“Sabi ko, 'Siguro, nakapag-ipon din naman ako nang konti para mabuhay tayo nang simple,' ganu'n.

“So 'yun 'yung nag-change sa kanya. Na-relax na siya. Na finally, ‘I have someone na if when all else fails, she’s got my back.’ So 'yun 'yung lagi kong ipinapaalala sa kanya, 'pag nawala lahat, don’t worry.”

Ahhhwww…. how sweet!