Impormasyon sa dokumento ng guidance counselor

ni Atty. Persida Rueda-Acosta - @Magtanong Kay Attorney | September 02, 2021

Dear Chief Acosta,

Isa akong registered guidance counselor at gumawa ako ng psychological testing document kaugnay ng aking trabaho. Ano ang impormasyong nararapat na ilagay sa nasabing dokumento? – Ivee

Dear Ivee,

Para sa inyong kaalaman, ang batas na sumasaklaw sa sitwasyon na inyong inilahad ay ang Section 22 ng Republic Act (R. A.) No. 9258 na mas kilala bilang “Guidance and Counseling Act of 2004,” na kung saan nakasaad ang sumusunod:

“Section 22. Indication of Certificate of Registration Number and Professional Tax Receipts (PTR). - The Guidance Counselors shall be required to indicate his/her Certificate of Registration number, the date of issuance, the period of validity of the license, including the professional tax receipt number on the documents he/she signs, uses or issues in connection with the practice of his/her profession.”

Ibig sabihin, ang mga guidance counselor ay kinakailangang maglagay ng kanilang certificate of registration number, ang petsa ng pagkaisyu at ang panahon ng validity nito, pati na ang kanilang professional tax receipt number sa mga dokumentong pinirmahan nila, ginagamit o mga naisyung may kaugnayan sa kanilang propesyon. Sa inyong sitwasyon, nararapat ninyong lagyan ng impormasyon tulad ng inyong certificate of registration number, ang petsa ng pagkaisyu at ang panahon ng validity nito, pati na ang inyong professional tax receipt number, ang ginawa ninyong psychological testing document kaugnay ng inyong trabaho.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.