Idinaan pa ng aktor sa IG… SHUVEE, NAPAIYAK SA SINABI SA KANYA NI DINGDONG

ni Vinia Vivar @Frankly Speaking | July 29, 2026

Photo: IG _dongdantes

Napaiyak ni Dingdong Dantes ang GMA Sparkle artist na si Shuvee Etrata.

Sa Instagram (IG) post kasi ng aktor ay pinuri-puri niya ang dalaga bilang katrabaho sa GMA Primetime series nilang The Master Cutter (TMC).

“I first met @shuveeetrata on Amazing Earth when I interviewed her. But it was on The Master Cutter where I really got to know her,” aniya.

Tsika ni Dingdong, masayang kasama si Shuvee at lagi raw namimigay ng ice cream sa set.

“Kahit sa set, lagi n’ya kaming binibigyan ng mga Bisaya challenges. That’s just her… always jolly, authentic, and unapologetically herself. Parati pa namimigay ng ice cream!” kuwento ni Dingdong.

“What makes it even more special is seeing that same authenticity translate into her craft. Seeing what she did with Tonette just proves she’s got so much more to offer as an actress,” patuloy pa niya.

Payo ng aktor kay Shuvee, “Never lose that spark(le), Shuvee. It’s your superpower.”

Aniya pa, “Isang Kapuso. Isang proud Bisaya. And someone we can all look forward to seeing even more of.”

Sa comment section ay sumagot naman si Shuvee na labis na na-touch sa mga magagandang sinabi ni Dingdong tungkol sa kanya.

“Kagabi pa po ako umiiyak! Kuya Dong, thank you po dahil marami po akong natutunan sa inyo. Isa ka sa pinakamagaling na artista at pinakamabait sa lahat. ‘Di alam ng lahat na may kulit ka rin, kahit na ikaw na si ‘Mr. Dingdong Dantes’!

“Habambuhay po mananatili sa akin ang mga memories natin d’yan sa set. Thank you dahil tinanggap n’yo ang pagka-Bisaya ko. At higit sa lahat, thank you sa pagmamahal n’yong lahat! Dadalhin ko po lahat ‘yun sa puso ko forever.” mensahe ni Shuvee kay Dingdong.

---

MAINIT ang naging pagsalubong ng mga manonood sa comeback teleserye nina Kathryn Bernardo, James Reid, at Maja Salvador matapos mag-premiere ang Someone, Someday (SS) bilang most-watched show sa Netflix Philippines sa loob lamang ng 12 oras. 

Pasok din ang serye sa listahan ng Top 10 most-watched shows sa Singapore at Malaysia.

Inabangan din ng mga Kapamilya ang TV premiere ng primetime series noong Lunes (Hulyo 27), na nakapagtala ng 334,170 peak concurrent viewers o sabay-sabay na nanonood sa YouTube (YT).

Nakakuha rin ito ng iba’t ibang trending topics sa X (dating Twitter) matapos purihin ng mga manonood ang ‘refreshing’ na kuwentong handog ng serye.

Ipinakilala sa pilot episode ang matibay na samahan ng mag-BFF na sina Billy (Kathryn) at Jordan (James), lalo na nang palakasin ni Jordan ang loob ni Billy matapos itong iwanan sa altar ng kanyang fiancé (JC De Vera).

Ibinida rin sa episode ang pagiging mapagmahal na ate ni Billy na handang gawin ang lahat para sa kanyang kapatid na si Oliver (Migz Casimiro), na may diabetes. 

Kaabang-abang din ang mga susunod na episodes sa pagpasok ng misteryosong karakter ni Maja.

Napapanood ang Someone, Someday gabi-gabi, mula Lunes hanggang Biyernes, 8:45 PM sa ALLTV2, TV5, A2Z, Kapamilya Channel, Kapamilya Online Live sa YouTube (YT) at Facebook (FB), at TFC.