ICC, pinayagang gamitin ang naitalang testimonya ni 'P-1100' sa kaso ni Duterte

by BRT @News | October 4, 2026

Photo: ICC / SS

Pinayagan ng International Criminal Court (ICC) ang mga prosecutor na gamitin ang naunang naitalang testimonya ng testigong P-1100 sa kaso laban kay dating Pangulong Rodrigo Duterte.

May kaugnayan ang testimonya sa umano’y operasyon ng Davao Death Squad at sa sinasabing kaalaman, intensiyon at pananagutan ni Duterte sa mga krimeng iniuugnay sa grupo.

Ayon sa ICC, hindi makaaapekto sa karapatan ng depensa ang paggamit ng naitalang testimonya dahil bibigyan pa rin sila ng pagkakataong kuwestiyunin si P-1100. Makakatulong din umano ito para mapabilis ang paglilitis.

Sa halip na pitong oras na pagtatanong, isang oras lamang ang itinakda ng korte para sa karagdagang pagtatanong ng prosecution kay P-1100.

Nilinaw naman ng ICC na paunang pahintulot pa lamang ito. Kailangan pa ring humarap sa korte si P-1100 at pumayag sa paggamit ng kanyang naitalang testimonya.