Du30, humarap na sa ICC

ni Mylene Alfonso @News | September 17, 2026

Photo: Ang dating Pangulong Rodrigo Duterte - International Criminal Court

Sa kauna-unahang pagkakataon, personal na dumalo si dating Pangulong Rodrigo Duterte sa status conference ng International Criminal Court (ICC) kaugnay ng kasong crimes against humanity na kinakaharap niya.

Nakasuot ng itim na amerikana at puting polo na walang kurbata habang nakaupo ang dating pangulo na nakasandal ang kanyang baba sa magkapatong na mga kamay nang buksan ang pagdinig.

Binanggit ni Judge Joanna Korner na ito ang unang pagkakataon na personal na humarap sa korte ang dating pangulo, at ipinaalala na maaari siyang umalis ng silid ng pagdinig anumang oras nang hindi na kinakailangang humingi ng pahintulot sa hukuman.

Patuloy na iginiit ng kanyang abogado na hindi siya akmang humarap sa paglilitis, dahil sa mga alalahanin sa kanyang kalusugan kaugnay ng kanyang edad, partikular na ang umano'y problema sa kanyang memorya.

Sa naturang status conference, tatalakayin ng Trial Chamber ang mga paghahanda para sa paglilitis, kabilang ang listahan ng mga testigo ng prosekusyon, oras na ilalaan sa pag-uusig, mga ebidensiyang ihaharap, pagbubunyag ng ebidensiya sa depensa, at iba pang mahahalagang usaping may kaugnayan sa kaso.

Pag-uusapan din ng korte ang iskedyul ng mga pagdinig mula Nobyembre 30, 2026 hanggang sa Spring Recess ng 2027, pati ang panukalang magkaroon ng magkakahiwalay na bloke ng mga pagdinig na may mga pagitan ng pahinga batay sa rekomendasyon ng mga eksperto.

Matatandaang nahaharap si Duterte sa kasong crimes against humanity kaugnay ng mga umano’y pagpatay sa panahon ng kanyang panunungkulan bilang alkalde ng Davao City at bilang Pangulo ng Pilipinas.

Noong Marso 2025, inaresto si Duterte sa Ninoy Aquino International Airport (NAIA) Terminal 3 at kasalukuyang nakadetine sa ICC Detention Centre sa Scheveningen, The Hague, Netherlands, habang nagpapatuloy ang proseso ng kanyang paglilitis.

Du30, inaasahang personal na dadalo sa Sept. 7 hearing — ICC

ni Mylene Alfonso @News | June 25, 2026

Photo: ICC

Inaasahang personal na dadalo si dating Pangulong Rodrigo Duterte sa status conference ng International Criminal Court (ICC) sa Setyembre 7 kaugnay ng kinakaharap nitong kasong crimes against humanity.

Sa ikalawang status conference, sinabi ni Presiding Judge Joanna Korner na pinayagan lamang ang pagliban ni Duterte sa pagdinig dahil maikli lamang ito.

“Again, Mr. Haynes, we’ve excused your client’s attendance today, but as I think we made clear, it’s only because it’s a relatively short hearing,” ani Korner sa defense lawyer na si Peter Haynes.

Kinilala naman ni Haynes na inaasahan ng hukuman ang pagdalo ni Duterte sa mga susunod na pagdinig.

Sa pagtatapos ng pagdinig, itinakda ng ICC ang mga pansamantalang petsa para sa mga susunod na status conference sa Hulyo 14, Setyembre 7, Oktubre 13 at Nobyembre 2.

Gayunman, binigyang-diin din ng hukom ang kahalagahan ng conference sa Setyembre 7.

“I rather feel the one on the 7th of September because by the time we’ve had the reports is likely to be an important one and for that certainly, Mr. Haynes, we would expect Mr. Duterte to be here unless there’s some medical issue,” hirit ni Korner.

Utos ng ICC... Bagong medical exam kay Du30

ni Mylene Alfonso @News | June 14, 2026

Photo: ICC

Ipinag-utos ng International Criminal Court (ICC) Trial Chamber III ang panibagong medical examination kay dating Pangulong Rodrigo Duterte upang matukoy kung siya ay nasa maayos na kondisyon at karapat-dapat na humarap sa paglilitis na nakatakdang magsimula sa Nobyembre 30.

Sa kautusan nito, sinabi ng ICC Trial Chamber III na kinakailangan ang pagsusuring medikal alinsunod sa Rule 135 ng Rules of Procedure and Evidence upang maayos nitong magampanan ang mga obligasyon nito sa ilalim ng Article 64 ng Rome Statute at makapagpasya sa anumang usapin kaugnay ng kakayahan ni Duterte na humarap sa paglilitis.

Ang resulta ng medical examination ay inaasahang magiging mahalagang batayan ng korte sa pagtukoy kung maipagpapatuloy ang nakatakdang paglilitis.

Nahaharap si Duterte sa mga kaso sa ICC kaugnay ng umano’y crimes against humanity na may kaugnayan sa kanyang anti-drug campaign.

Ayon ito sa pampublikong bersyon ng dokumentong may tinanggal na ilang sensitibong detalye na pinamagatang “Decision Appointing Experts for the Purpose of a Medical Examination Pursuant to Rule 135 of the Rules of Procedure and Evidence,” na may petsang Hunyo 12, 2026 at inilabas noong Sabado.

“Accordingly, the Chamber is yet to address and resolve the issue of the Accused’s fitness, having not been involved in the previous assessment and determination made by the Pre-Trial Chamber, which was limited in scope to the pre-trial proceedings,” nakasaad sa dokumento.

“Given that the Accused is now to stand trial, the Chamber finds that it requires an objective assessment of the Accused’s health by independent experts for the purposes of making a determination as to his fitness to stand trial,” ayon pa sa dokumento.