Pinatakas daw si Bato na wanted sa The Hague... ICC din ang dapat magkaso sa 'kin — Robin

ni Mylene Alfonso @News | September 17, 2026

Photo: Ang dating Pangulong Rodrigo Duterte - International Criminal Court

Mas gugustuhing humarap ni Senador Robin Padilla sa International Criminal Court (ICC) kaysa humarap sa Department of Justice (DOJ) kaugnay ng kasong obstruction of justice.

Ginawa ni Padilla ang reaksyon  matapos siyang sampahan ng Philippine National Police (PNP) ng obstruction of justice dahil umano sa pagtulong kay Sen. Ronald “Bato” dela Rosa na makaiwas sa pagpapatupad ng arrest warrant na inilabas ng ICC.

“Ang kaso ko ay nagmula sa warrant of arrest ng ICC na isang dayuhan. Parang pakiramdam ko discriminated ako…  Sana dalhin n’yo na lang sa ICC ang kaso, tutal sila ang sinasabi na doon ako nagkaroon ng pagkakamali,” paliwanag ni Padilla sa press conference.

Iginiit din ng senador na mas masakit para sa kanya na kapwa Pilipino ang nagsampa ng reklamo kaugnay ng isang warrant na nagmula sa dayuhang hukuman.

“Mataas ang pride ko. Proud naman ako na talagang dayuhan ang kalaban ko, kasi masakit naman na ang nagrereklamo sa akin kapwa ko Pilipino. Masakit para sa akin ’yon,” aniya.

Sinabi ni Padilla na kung ang warrant laban kay Dela Rosa at ang subpoena sa kanya ay nagmula sa korte sa Pilipinas, mas magiging magaan aniya ang kanyang pakiramdam.

“Wala naman kasing warrant galing sa atin… Kung gusto niyo magkaroon ako ng kalaban, ‘wag naman kapwa Pilipino, ilaban n’yo ako sa dayuhan para may pride naman ako kaunti,” punto ng senador.

Sa kabila nito, tiniyak ni Padilla na susunod siya sa ipinadalang subpoena ng DOJ at haharap sa mga piskal ng ahensya.

“Bilang mamamayan, ayos lang ito. Daraanan natin ito… May due process tayo at naniniwala ako sa due process,” ayon pa kay Padilla.

Matatandaang nahaharap si Dela Rosa sa kasong crimes against humanity sa ICC kaugnay ng kanyang umano’y papel sa mga extrajudicial killings sa panahon ng kampanya kontra ilegal na droga ng administrasyon ni dating Pangulong Rodrigo Duterte.

Du30, humarap na sa ICC

ni Mylene Alfonso @News | September 17, 2026

Photo: Ang dating Pangulong Rodrigo Duterte - International Criminal Court

Sa kauna-unahang pagkakataon, personal na dumalo si dating Pangulong Rodrigo Duterte sa status conference ng International Criminal Court (ICC) kaugnay ng kasong crimes against humanity na kinakaharap niya.

Nakasuot ng itim na amerikana at puting polo na walang kurbata habang nakaupo ang dating pangulo na nakasandal ang kanyang baba sa magkapatong na mga kamay nang buksan ang pagdinig.

Binanggit ni Judge Joanna Korner na ito ang unang pagkakataon na personal na humarap sa korte ang dating pangulo, at ipinaalala na maaari siyang umalis ng silid ng pagdinig anumang oras nang hindi na kinakailangang humingi ng pahintulot sa hukuman.

Patuloy na iginiit ng kanyang abogado na hindi siya akmang humarap sa paglilitis, dahil sa mga alalahanin sa kanyang kalusugan kaugnay ng kanyang edad, partikular na ang umano'y problema sa kanyang memorya.

Sa naturang status conference, tatalakayin ng Trial Chamber ang mga paghahanda para sa paglilitis, kabilang ang listahan ng mga testigo ng prosekusyon, oras na ilalaan sa pag-uusig, mga ebidensiyang ihaharap, pagbubunyag ng ebidensiya sa depensa, at iba pang mahahalagang usaping may kaugnayan sa kaso.

Pag-uusapan din ng korte ang iskedyul ng mga pagdinig mula Nobyembre 30, 2026 hanggang sa Spring Recess ng 2027, pati ang panukalang magkaroon ng magkakahiwalay na bloke ng mga pagdinig na may mga pagitan ng pahinga batay sa rekomendasyon ng mga eksperto.

Matatandaang nahaharap si Duterte sa kasong crimes against humanity kaugnay ng mga umano’y pagpatay sa panahon ng kanyang panunungkulan bilang alkalde ng Davao City at bilang Pangulo ng Pilipinas.

Noong Marso 2025, inaresto si Duterte sa Ninoy Aquino International Airport (NAIA) Terminal 3 at kasalukuyang nakadetine sa ICC Detention Centre sa Scheveningen, The Hague, Netherlands, habang nagpapatuloy ang proseso ng kanyang paglilitis.

Du30, inaasahang personal na dadalo sa Sept. 7 hearing — ICC

ni Mylene Alfonso @News | June 25, 2026

Photo: ICC

Inaasahang personal na dadalo si dating Pangulong Rodrigo Duterte sa status conference ng International Criminal Court (ICC) sa Setyembre 7 kaugnay ng kinakaharap nitong kasong crimes against humanity.

Sa ikalawang status conference, sinabi ni Presiding Judge Joanna Korner na pinayagan lamang ang pagliban ni Duterte sa pagdinig dahil maikli lamang ito.

“Again, Mr. Haynes, we’ve excused your client’s attendance today, but as I think we made clear, it’s only because it’s a relatively short hearing,” ani Korner sa defense lawyer na si Peter Haynes.

Kinilala naman ni Haynes na inaasahan ng hukuman ang pagdalo ni Duterte sa mga susunod na pagdinig.

Sa pagtatapos ng pagdinig, itinakda ng ICC ang mga pansamantalang petsa para sa mga susunod na status conference sa Hulyo 14, Setyembre 7, Oktubre 13 at Nobyembre 2.

Gayunman, binigyang-diin din ng hukom ang kahalagahan ng conference sa Setyembre 7.

“I rather feel the one on the 7th of September because by the time we’ve had the reports is likely to be an important one and for that certainly, Mr. Haynes, we would expect Mr. Duterte to be here unless there’s some medical issue,” hirit ni Korner.