Hold Departure Order (HDO) sa ilalim ng RA 9262

ni Atty. Persida Rueda-Acosta - @Magtanong Kay Attorney | December 24, 2021

Dear Chief Acosta,

Mayroon akong ex at nagkaroon kami ng anak na lalaki. Bagama’t kinikilala niya ang aming anak, lubhang napakahirap humingi ng sustento sa kanya. Wala siyang problema sa pera dahil marami siyang pinagkakakitaan pero sadyang ginigipit niya kami upang pasakitan ako. Ako kasi ang nakipaghiwalay sa kanya dahil masama ang ugali niya at hindi niya ako nirerespeto. May ilang beses na niyang sinabi na kaya niya diumano ginagawa na hindi sustentuhan ng tama ang anak namin ay para hindi ako maka-move on o magkaroon ng panibagong nobyo. Masasabi bang pang-aabuso ang ginagawa niya? Nais ko siyang kasuhan sana dahil pakiramdam ko sobrang inaabuso niya ako. Maaari rin kaya na humingi ng kautusan sa hukuman para hindi siya makaalis ng bansa? Iniisip ko kasi may kakayahan siyang umalis ng bansa, baka hindi niya harapin ang kaso. – Julie

Dear Julie,

Maraming uri o paraan ng pang-aabuso sa babae mula sa kanyang asawa, karelasyon o kahit pa sa dating naging karelasyon. Ang isa rito ay ang tahasang hindi pagbibigay ng angkop na suporta upang limitahan ang kilos ng naturang babae o ng kanyang/kanilang anak. Batay sa Republic Act No. 9262 o mas kilala bilang Anti-Violence Against Women and Their Children Act of 2004:

“SECTION 5. Acts of Violence Against Women and Their Children.- The crime of violence against women and their children is committed through any of the following acts:x x x

(e) Attempting to compel or compelling the woman or her child to engage in conduct which the woman or her child has the right to desist from or desist from conduct which the woman or her child has the right to engage in, or attempting to restrict or restricting the woman’s or her child’s freedom of movement or conduct by force or threat of force, physical or other harm or threat of physical or other harm, or intimidation directed against the woman or child. This shall include, but not limited to, the following acts committed with the purpose or effect of controlling or restricting the woman’s or her child's movement or conduct: x x x

(2) Depriving or threatening to deprive the woman or her children of financial support legally due her or her family, or deliberately providing the woman’s children insufficient financial support; x x x”

(Binigyang-diin)

Kung makitaan ng probable cause ang inyong reklamo ay maaaring maihain ang kasong kriminal laban sa inyong dating nobyo sa hukuman. Sa hukuman din maaaring hilingin ang pagpapalabas ng Hold Departure Order upang hindi siya makalabas ng bansa at maharap niya ang kaso laban sa kanya. Sa katunayan, nakasaad sa Section 37 ng R. A. No. 9262 ang sumusunod:

“SECTION 37. Hold Departure Order. – The court shall expedite the process of issuance of a hold departure order in cases prosecuted under this Act.”

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.