Hagupit ng habagat... Baha lagpas-tao, mga bahay inanod, tulay bumagsak

by Jeff Tumbado @News | August 30, 2026

Photo: Gumuho na bahagi ng Ninoy Aquino Bridge sa Brgy. San Isidro dulot ng habagat - Photo courtesy of Tarlac Gov. Christian Yap

Gumuho ang bahagi ng Ninoy Aquino Bridge sa Brgy. San Isidro matapos umapaw ang ilog dahil sa malakas na ulan, habang patuloy na nagdudulot ang pinatinding habagat ng malawakang pagbaha, paglikas at mapanganib na biglaang pagbaha sa Gitnang Luzon nitong Sabado, Agosto 29.

Sa kuha ng CCTV, naitala alas-6:40 at 6:57 ng umaga nitong Sabado ang pagguho ng bahagi ng tulay matapos umapaw ang Ilog Tarlac dahil sa ilang araw na malakas na pag-ulan.

Tinangay din ng malakas na ulan noong Biyernes, Agosto 28, ang ilang bahay malapit sa Ilog Tarlac.

Sa Pampanga, nanatiling malaking suliranin ang pagbaha habang patuloy na pinapaapaw ng malakas na ulan ang mga ilog at daluyan ng tubig sa lalawigan.

• 

  Nanatiling malaking suliranin ang pagbaha habang patuloy na pinapaapaw ng malakas na ulan.Photo: PCG

Nananatili sa ilalim ng Flood Watch ang Pampanga River Basin, dahil nagbabanta ang tumataas na lebel ng tubig sa mga komunidad na nasa tabi at ibabang bahagi ng sistema ng ilog.

Sa Bulacan, nanatili ring malubha ang pagbaha kung saan hindi bababa sa anim na bayan, kabilang ang Hagonoy, Calumpit, Balagtas at Paombong, ang nag-ulat ng mga binahang komunidad.

Sa Marilao, isinailalim sa preemptive evacuation ang humigit-kumulang 200 pamilya sa NorthVille, Brgy. Lambakin, matapos lumampas sa tatlong talampakan ang tubig-baha. Umapaw din ang Ilog Marilao.

Samantala, nagpatupad ng mas mahigpit na pagmamanman sa mga mabababang komunidad malapit sa Ilog Tullahan matapos tumaas ang lebel ng tubig sa La Mesa Dam.

Umabot sa spilling level bandang alas-6 ng gabi nitong Sabado, Agosto 29, ang dam, na nagtala ng lebel ng tubig na 80.33 metro.

Sa Bataan, isinailalim din ang lalawigan sa Red Rainfall Warning habang pinataas ng malakas na ulan ang panganib ng matinding pagbaha sa mga komunidad na madaling maapektuhan.

Ipinadala ang mga rescue at disaster-response team sa Dinalupihan matapos umabot umano sa anim hanggang pitong talampakan ang tubig-baha sa Brgy. San Pablo dahil sa pag-apaw ng isang lokal na ilog.

Mino-monitor din ng mga awtoridad ang kondisyon ng baha malapit sa Capitol Drive at Ilog Talisay sa Lungsod ng Balanga habang nagpapatuloy ang pag-ulan.

Sa Lungsod ng Olongapo, napilitang lumikas patungo sa mas ligtas na lugar ang libo-libong residente dahil sa malawakang pagbaha.

Umabot sa baywang hanggang leeg ang tubig-baha sa ilang komunidad, kabilang ang Purok 1 sa Brgy. Sta. Rita. Naiulat din ang mabilis na pag-agos ng tubig-baha sa Sitio Iram at Gordon Heights.

Kaliwa't kanang baha rin ang naranasan sa Metro Manila bunsod ng walang humpay na ulan. Sa Parañaque, umabot sa halos lagpas-tao ang baha kaya gumamit na ng bangka para makatawid.