Gilas Women's nasa Jordan para sa 2021 FIBA Asia Cup

ni MC - @Sports | September 22, 2021

Tumulak na pa-Jordan kagabi ang Gilas Pilipinas women’s national basketball team para lumahok sa 2021 FIBA Women’s Asia Cup sa Set. 27 hanggang Okt. 3.

Kinumpirma ito ni Ryan Gregorio, ang Samahang Basketbol ng Pilipinas (SBP) special assistant to the president, at sinabing ang delegasyon ay bubuuin ng 12 players at seven staff.

Pangungunahan nina veterans Afril Bernardino at Janine Pontejos ang team na bubuuin nina Andrea Tongco, Ria Nabalan, France Mae Cabinbin, Khate Castillo, Clare Castro, Mar Prado , Ella Fajardo, Camille Clarin, Kristine Cayabyab, at Karl Ann Pingol.

Kasama ni head coach Patrick Aquino sina assistant coaches Julie Amos at Jose Ramos Garcia at trainer Paolo Gorospe. Nasa delegasyon din sina Dr. Jessie Lazaro, ang team doctor, Rassel Urag (PT), at Leonardo Felisilda (Utility).

Nagdaos ng training camp ang squad sa Lipa, Batangas nitong Setyembre para paghandaan ang mahigpit na kompetisyon sa Asia Cup kung saan makasasagupa ng nationals ang no. 3 Australia, no. 7 China, at no. 34 Chinese Taipei sa group phase ng Division A.

Hindi naman makalalaro sa team ang kanilang main gunner na si Jack Animam dahil kasalukuyan itong nag-eensayo para sa paglalaro sa Serbia.