ni Anthony E. Servinio @Sports | December 14, 2023
Umapoy para sa 64 puntos at 14 rebound si Giannis Antetokoumpo sa 140-126 panalo ng Milwaukee Bucks sa NBA Cup runner-up Indiana Pacers kahapon sa Fiserv Forum. Ang 64 ay bagong personal na marka ng “Greek Freak” na hinigitan ang 55 sa 123-113 panalo kontra Washington Wizards noong Enero 3, 2023.
Itinala ni Giannis ang kanyang ika-56 puntos upang itulak ang Milwaukee sa 127-106 lamang at apat na minuto ang nalalabi. Kahit malaki ang agwat, hindi umupo ang dating MVP at gumawa pa ng walong puntos.
Sumuporta sina Damian Lillard na may 21 at reserba Bobby Portis na may 19. Parehong may tig-22 puntos sina Tyrese Hailburton at Myles Turner ng Indiana.
Umakyat din sa ika-limang may pinakaraming three-points sa kasaysayan ng NBA si Lillard at pumukol ng dalawa para maging 2,451 at lampasan ang 2,450 ni Kyle Korver mula 2003 hanggang 2020. Sunod niyang hahabulin ang 2,560 ng Pacers alamat Reggie Miller mula 1987 hanggang 2005.
Bumawi ang NBA Cup champion Los Angeles Lakers at binitin ang huling hirit ng kulelat San Antonio Spurs, 122-119, sa gitna ng pagliban ni MVP LeBron James. Noong isang araw, yumuko sina LBJ at Lakers sa Dallas Mavericks, 125-127, sa unang laro matapos ang makasaysayang kampeonato.
Samantala, suspendido muli si Draymond Green ng Golden State Warriors at ngayon ay walang katiyakan kung kailan siya makakabalik sa NBA. Malakas na hinampas ni Green si sentro Jusuf Nurkic ng Phoenix Suns sa mukha sa third quarter at agad pinalabas sa laro noong Miyerkules kung saan natalo ang Warriors, 116-119.
Tinimbang ng liga ang nagpatong-patong na parehong kaso ni Green. Nitong Nobyembre lang ay nasuspinde siya ng limang laro matapos sakalin sa leeg gamit ang braso si Rudy Gobert ng Minnesota Timberwolves.