Gamer daw siya, oks naman ang mental health… TEDDY, TUTOL NA I-BAN ANG VIOLENT VIDEO GAMES SA MGA BATA

ni Beth Gelena @Bulgary | June 29, 2026

Photo: Teddy Corpuz - IG

May panawagan ang gobyerno na ipagbawal ang mga violent video games, ngunit hindi ito sinang-ayunan ng singer-TV host na si Teddy Corpuz. Sinabi niya na bilang isang matagal nang gamer, hindi niya naranasan na maging marahas dahil lamang sa paglalaro.

Binanggit pa niya, “Naglalaro ako ng Call of Duty pero okey naman ako. Okey naman ang mental health ko at anger management ko.”

Para kay Teddy, mas malalaking isyu ang dapat tutukan kaysa sa simpleng pagbabawal ng mga laro. Aniya, mas mahalagang pagtuunan ng pansin ang mas maayos na sistema ng edukasyon, mas mahigpit na seguridad sa mga paaralan, responsableng pagmamay-ari ng baril, at mas mabuting paggabay ng mga magulang.

Nagbigay din siya ng halimbawa na kahit sa basketball ay may mga insidente ng karahasan dahil sa init ng kompetisyon.

Aniya, kung ganoon ang lohika, hindi naman ibig sabihin na dapat na ring ipagbawal ang basketball.

Sa huli, kinuwestiyon niya kung talagang mawawala ang mga krimeng kinasasangkutan ng mga menor-de-edad kung ipagbabawal ang violent video games.

Para sa kanya, marami pang dapat pag-aralan at ayusin, at hindi sapat ang pagbabawal bilang solusyon.

Ang pahayag ni Teddy Corpuz ay tugon sa panukala ni Jonvic Remulla na pag-aralan ang permanenteng pagbabawal sa mararahas na online games dahil sa pangambang maaari itong makaapekto sa pag-uugali ng kabataan.

Sa kasalukuyan, panukala pa lamang ito at wala pang batas na nagbabawal sa violent video games sa Pilipinas.

---

LALO yatang lumalaki ang isyu ng joke ni Kim Chiu kay Ryzza Mae Dizon at maging si Kris Aquino ay nasasangkot na rin.

May sinabi raw si Kris na ganito: “Du’n sa nabalitaan kong nang-aapi sa ‘yo, don’t mind them because success is the best revenge.”

Sey ng isang netizen, “Looking back, I realized she was right.”

Pagtatanggol naman ng isang fan, “‘Di naman si Kim ang tinukoy na nang-aapi kay Ryzza. ‘Yung sa interview n’ya kay Miss Toni Gonzaga, ikinuwento ni Ryzza na may kapitbahay silang nagsabi noon na mas mahal pa ang vase nila kaysa buhay ni Ryzza. ‘Yun ang tinutukoy ni

Kris, ‘di naman si Kim. Nagkataon lang na sakto ring nagkomento si Kim.”

Nagsimula ang isyung ito nang banggitin ni Kim Chiu bilang biro na kamukha ni Jugs Jugueta na naka-karakter ng Lotus Feet si Ryzza Mae Dizon. Todo-resbak naman ang mga fans dahil nainsulto ang kanilang idol na mas lalo pang gumulo dahil nadamay nga si Kris Aquino.

---

UMAMING nasaktan ang aktor na si James Blanco nang ibinahagi ng anak niyang si Iñigo Jose sa loob ng Pinoy Big Brother: Celebrity Collab Edition 2.0 (PBBCCE2.0) na hiwalay na ang kanyang mga magulang, ayon sa naging panayam sa aktor sa Fast Talk with Boy Abunda (FTWBA).

Ipinaliwanag niya na kahit matagal na siyang nasa showbiz, sinasadya niyang panatilihing pribado ang kanilang buhay-pamilya.

Ayon kay James, paulit-ulit niyang pinaalalahanan si Iñigo na huwag ihalo ang personal na buhay sa trabaho o sa publiko. Dagdag pa niya, mas masakit para sa kanya ang naging paglalantad dahil hindi alam ng publiko ang buong kuwento ng kanilang sitwasyon.

Sa kabilang banda, nilinaw din ni James na ipinagmamalaki pa rin niya ang kanyang anak at ang unti-unti nitong pagbuo ng sariling pangalan sa industriya, kahit na aminado siyang nagkaroon sila ng panahon na hindi nagkakausap.

Samantala, sa mga naunang panayam, naging emosyonal din si Iñigo nang mapag-uusapan ang kanyang ina at ibinahagi niyang malaki ang paghanga niya rito dahil ito ang nagtaguyod sa kanilang magkakapatid.

Sa kabuuan, ipinakita ng panayam na magkaiba ang pananaw ng mag-ama: nais ni James Blanco na manatiling pribado ang usaping pampamilya, samantalang naging bukas ang kanyang anak na si Iñigo Jose sa pagbabahagi ng kanyang personal na karanasan habang nasa loob ng PBB kamakailan.