Wala pang inaamin na magdyowa na… DUSTIN AT BIANCA, HOLDING HANDS SA SIARGAO

ni Beth Gelena @Bulgary | October 24, 2026

Photo: Bianca de Vera at Dustin Yu - IG

Lalong kinilig ang mga fans ng DustBia matapos muling magbahagi si Bianca de Vera ng sweet photos nila ni Dustin Yu mula sa kanilang bakasyon sa Siargao.

Sa Instagram (IG) post ng aktres noong Huwebes, Oktubre 22, ibinahagi niya ang ilang kuha nila ni Dustin sa isla na nilagyan niya ng caption na: “Siargao diaries.”

Hindi ito ang unang pagkakataong nagpakita ng sweetness ang dalawa sa kanilang Siargao getaway. Sa nauna niyang post, “Reset” naman ang naging caption ni Bianca.

Makikitang magkahawak-kamay sila habang namamasyal sa isla.

Mula nang makilala ang kanilang tambalan sa Pinoy Big Brother Celebrity Collab Edition (PBBCCE) Season 1, patuloy na sinusubaybayan ng kanilang mga supporters ang mga ganap sa buhay at career ng dalawa sa labas ng Bahay ni Kuya.

Sa ngayon, ang kanilang mga larawan sa Siargao ang nagbibigay ng bagong kilig sa DustBia fans, bagama't hindi ito awtomatikong nangangahulugang kumpirmado na ang tunay na estado ng kanilang relasyon.

Sabagay, hindi naman na kailangan ng opisyal na kumpirmasyon mula sa dalawang dating housemates ni Kuya. ‘Di ba, DustBia?

---

Labi namaga, taob si Angelina Jolie…

JOROSS, HINDI NA MAKATAYO SA SOBRANG TINDI NG SAKIT

KAHIT mataas ang lagnat, hindi napigilan si Joross Gamboa na pumunta sa taping, pero pinauwi rin siya para magpagaling muna.

Ayon kay Noel Ferrer, nagpositibo sa Influenza B ang aktor batay sa resulta ng kanyang laboratory tests. Dahil sa lumalalang kondisyon, hindi na rin nakadalo si Joross sa mediacon ng pelikulang Remember.

Sa Facebook (FB) post ni Ferrer, pinuri niya ang dedikasyon ng aktor sa trabaho, pero ikinuwento rin ang kalagayan nito na kinailangang magpahinga matapos pumasok sa taping kahit nilalagnat.

Aniya, “GET WELL SOON, Joross Gamboa. The professional that you are, you still reported to your taping yesterday even with a high fever; and thank you to the Code Gray prod for understanding Joross’ situation and for sending him home yesterday evening.”

Hindi rin itinago ng misis ni Joross na si Katz ang tindi ng nararamdaman ng aktor. 

Ayon kay Ferrer, “Katz (Joross’ wife) said: ‘Joross is very sick po talaga and he has had a fever since yesterday. He hasn’t been able to get out of bed, and can barely speak because of his sore throat.’”

Bukod sa flu at sore throat, namamaga rin ang mga labi ni Joross, dahilan para hindi na niya maituloy ang pagdalo sa mediacon.

Dahil dito, pabirong ikinumpara pa ng aktor ang kanyang namamagang labi sa Hollywood actress na si Angelina Jolie habang ipinapaliwanag kay Ferrer kung bakit hindi siya makakadalo sa event.

Aniya pa, “To me, he said: ‘Sayang I was all set to attend the mediacon kasi kami lang ni Ana Abad Santos ang puwede sa support cast, kaso bukod po sa flu, maga po ang lips ko, talo ko pa po si Angelina Jolie. Bawi na lang po ako talaga! Sorry po.’”

Samantala, sa mismong social media post ng aktor, ibinahagi niya kung paano naging pagkakataon ang kanyang pagkakasakit upang mas makita at maramdaman ang pagmamahal ng Diyos sa pamamagitan ng mga taong nag-aalaga at nagdarasal para sa kanya.

Pahayag niya, “Nu’ng nagkasakit ako, ipinag-pray ko kay Lord na ma-glorify s’ya through my sickness. ‘Di ko alam kung paano, pero now ay nakikita ko ‘yun sa mga kaibigan ko, pamilya ko, at lalung-lalo na sa asawa ko, kung gaano ako kamahal ng Diyos.”

Nagpasalamat din siya sa pag-aalala at pag-aalaga ng kanyang pamilya at mga kaibigan, lalo na ng kanyang misis na patuloy na umaalalay sa kanya habang nagpapagaling.

Aniya, “‘Yung concern nila at pag-pray sa ‘kin at kung paano ako alagaan. Thank you, Jesus!”

Bagama’t umaasa siyang agad na gagaling, ipinahayag ni Joross na hindi magbabago ang kanyang pananampalataya anuman ang mangyari.

Sabi ng aktor, “I pray na gumaling na ako, pero kung ‘di man ako gumaling, You are still my God!”

Hindi rin niya kinalimutan ang iba pang may karamdaman. Hiniling niyang gumaling din ang mga taong dumaranas ng kaparehong pagsubok at maranasan ang pagmamahal ng Diyos sa gitna ng kanilang pinagdaraanan.

Aniya, “I’m praying for everyone to get better na may sakit din tulad ko, but more than that, I pray that they will see God’s love during these dark times. All Glory to God!”

Sa ngayon, nakarekober na nang maayos si Joross. 

Last na raw niya… REGINE, HINAPLOS ANG STAGE NG MOA SA FINALE CONCERT

ni Beth Gelena @Bulgary | October 23, 2026

Photo: Tiktok Circulated

Tapos na ang FINALE concert, pero pinag-uusapan pa rin ang emosyonal na pamamaalam ng Asia’s Songbird na si Regine Velasquez.

Sa huling gabi ng show, tumagos sa puso ng mga fans ang tagpong hinaplos ni Regine Velasquez ang stage ng SM Mall of Asia (MOA) Arena.

Sa simpleng paghaplos ni Regine sa entablado, dama ang bigat ng mga alaalang iniwan niya roon sa loob ng ilang dekada ng kanyang paglalakbay bilang Asia’s Songbird. 

Naging emosyonal na sandali ito ng pasasalamat at pagpupugay sa entabladong naging saksi sa kanyang musika at mga awiting tumatak sa puso ng publiko, lalo na sa mga fans na matagal nang sumusubaybay sa kanyang karera.

Pero marami pa rin ang nagtatanong: Ito na nga ba ang huling pagkakataong mapapanood siya sa malalaking entablado, o isa lamang itong pamamaalam sa isang yugto ng kanyang karera?

Sey ng isang fan, “The Philippines’ most-celebrated and most-loved DIVA takes her final bow! Nakakaiyak! Hinawakan n’ya pa ‘yung stage as she said goodbye to the big stage.”

Sagot ng basher, “Maniwala kang final na ‘yan. Hangga’t may nagogoyo ang mga ‘yan, babalik at babalik ang mga ‘yan sa entablado.”

May ilan namang nakaunawa sa interview ni Regine kay Karen Davila na ang tinutukoy niyang huling concert ay ang mga pagtatanghal sa malalaking venues.

Sey ng mga netizens:

“Ang pagkakaintindi ko sa interview n’ya kay Karen Davila, last concert n’ya ‘yan sa malalaking venue pero magko-concert pa rin s’ya, like intimate.”

“Maybe, and this is also my way of retiring her old songs. Parang gumawa s’ya ng paraan para makanta n’ya sila one last time.”

“Sa mga hotel na lang s’ya or mga gatherings na maliit lang. Wala nang todo-effort na malakasang boses kasi ‘di na n’ya kaya ang ibang high notes.”

---

MOVIE NINA WILBERT AT BEA, NAKA-P40M SA ISANG LINGGO

Hindi lang kilig ang hatid nina Bea Binene at Wilbert Ross sa kanilang mga fans dahil nakapagtala na rin ng malaking tagumpay sa takilya ang kanilang tambalan.

Sa loob lamang ng pitong araw, umabot na sa P40 milyon ang kinita ng kanilang comedy-horror movie na Pee Mak (PM), patunay na mainit ang pagtanggap ng mga manonood sa WilBea love team. 

Produced ng Viva Films, ito ay Philippine adaptation ng 2013 Thai hit film na may kaparehong pamagat na pinagbidahan nina Mario Maurer at Davika Hoorne.

Well, unang nakilala ang WilBea sa kanilang pagtatambal sa seryeng Golden Scenery of Tomorrow at Love U Lots sa Viva One, kung saan kinagiliwan ang kanilang chemistry at mga nakakakilig na eksena.

Sa PM, si Wilbert ang gumaganap bilang Mak, isang sundalong umuwi mula sa digmaan kasama ang kanyang mga kasamahan.

Inimbitahan niya ang mga ito na tumuloy sa kanilang tahanan dahil sabik siyang makapiling muli ang kanyang pinakamamahal na asawang si Pee-Nang, na ginagampanan naman ni Bea.

Ngunit sa kanilang pagdating sa nayon, nagsimulang kumalat ang mga usap-usapan tungkol sa sinapit ng kanyang asawa. 

Ayon sa mga tagaroon, namatay umano ito habang nanganganak at nagbalik bilang isang multo.

Dito umiikot ang timpla ng katatakutan at komedya ng pelikula, habang sinusubok ang pagmamahalan nina Mak at Pee-Nang sa gitna ng mga misteryong bumabalot sa kanilang kuwento.

Kasama rin sa cast sina Jairus Aquino, Gian Bernardino, Vandolph at TJ Valderrama.

Sa direksiyon ni Victor Villanueva, nabigyan ang WilBea ng pagkakataong ipakita ang kanilang kakayahan sa ibang genre, lampas sa mga romantic series na unang nagpakilig sa kanilang fans.

Nagsasama na rin abroad… SANYA, UMAMING IPINAGLULUTO NA ANG BF NA FIL-AM

ni Beth Gelena @Bulgary | October 22, 2026

Photo: IG _sanyalopez

Inamin ng aktres na si Sanya Lopez na half-Filipino, half-foreigner ang kanyang dyowa pero hindi na niya isiniwalat ang iba pang detalye sa identity nito.

Sa segment na Chika or Add to Cart, tinanong ang aktres kung handa na ba siyang sabihin sa publiko ang pangalan ng kanyang boyfriend.

Maaaring sagutin ng kalahok ang tanong o piliing hindi kapalit ng pagbili ng isang item.

Pinili ng aktres ang ‘Add to Cart’ dahil nais niyang protektahan ang kanilang relasyon.

“Naniniwala kasi ako sa evil eye. ‘Pag may nalaman ‘yung ibang tao, minsan nauudlot. Kaya sa projects ko o kahit saan, laging may ganu’n kaya ayaw ko nang mangyari,” paliwanag niya.

Bagama’t mas pinipili ni Sanya na panatilihing pribado ang kanilang relasyon sa social media, nilinaw niyang hindi niya itatanggi ang boyfriend sakaling makita silang magkasama sa publiko.

“Meron naman, pero ‘di sa social media. ‘Pag nakita kami sa labas, ‘di ko naman s’ya itatanggi,” aniya.

---

Todo-suporta sa Asia’s Songbird…

SARAH AT MATTEO, NASA VIP SECTION SA CONCERT NI REGINE, WALANG MASYADONG KATABI

USAP-USAPAN online ang pagdalo ng Popstar Royalty na si Sarah Geronimo kasama ang kanyang asawang si Matteo Guidicelli sa ikatlong gabi ng FINALE concert ng Asia’s Songbird na si Regine Velasquez-Alcasid. 

Nasa VIP section ang mag-asawa kaya napansin ng iba na maraming bakanteng seats sa paligid nila.

May mga netizens na nanghinayang sa mga upuang tila hindi nagamit, gaya ng komento ng isa, “Sayang ‘yung seats (sa VIP), daming gustong manood.”

Sagot naman ng isa pang netizen, “Ang mga upuan sa VIP section ay ‘di ibinebenta sa publiko dahil nakalaan ang mga ‘to para sa mga espesyal na bisita.”

Sa kabila ng diskusyon, ikinatuwa ng mga fans ang pagdalo ni Sarah upang suportahan ang Asia’s Songbird. Marami rin ang nanghinayang na hindi nakasama ang Popstar Royalty bilang guest sa huling concert ni Regine.