Ex ng misis na si Sharon, bully daw… SEN. KIKO KAY SEN. ROBIN: ‘DI UUBRA ANG PASIGA-SIGA SA AKIN

ni Janiz Navida @Showbiz Special | May 14, 2026

Photo: FB Robin Padilla & Kiko Pangilinan

Hindi tinanggap ni Sen. Robin Padilla ang pakikipagkamay ng kapwa senador na si Sen. Kiko Pangilinan matapos makapagtaas ng boses ang mister ni Megastar Sharon Cuneta sa ex-BF ng singer-actress sa ginanap na sesyon sa Senado nu’ng Martes.

Gustong magsampa ng reklamo ni Sen. Robin sa Ethics Committee ng Senado dahil hindi raw puwedeng basta na lang sigaw-sigawan ang isang Muslim na senador na tulad niya ng kapwa niya mambabatas.

Sumagot naman si Sen. Kiko sa kanyang Facebook post at aniya, huwag maging balat-sibuyas si Sen. Robin.

Ani Sen. Kiko, “Walang legal na basehan at walang kwenta ang ethics case complaint na ‘yan. Hintayin na lang natin ‘yung reklamo niya.”

Dagdag pa niyang hindi nasindak sa bantang pagsasampa ng reklamo sa kanya, “Kung sakali man, sasagutin ko ng kontra-reklamo sa Ethics Committee sa kanyang paglabag sa parliamentary rules at pagiging out of order at sa kawalan ng proper decorum, ang pagbabanta sa akin, pananakot at paninindak sa akin sa plenary session kanina habang naka recess. 

“Hindi uubra ang pambu-bully at pasiga-siga sa akin. Mas may basehang kasuhan ‘yang pasiga-siga, pambabastos at at ang kawalan ng proper decorum sa kapwa senador sa Senado. Lahat on record.”

Sinabi rin ng mister ni Sharon na ayaw niya ng away dahil hindi siya pala-away.

“Pero hindi ko aatrasan ang sinuman kung ang gusto ay ganitong walang kwentang kasuhan,” sagot ni Sen. Kiko.

Oh, ‘di ba, parehong palaban?! 

Ano naman kaya’ng reaksiyon ni Ate Shawie sa away ng mister at ex-BF niya? Hahahaha!

---

Dating mag-BFF, war na ngayon… 

ROB SY, UMAMING NABU-BULLY DIN ANG 8-ANYOS NA ANAK DAHIL SA DEMANDA NI ALFRED AT NG MISIS

Ayaw magsalita nu’ng una ni Rob Sy nang hingan namin ng update tungkol sa isinampang kaso sa kanila ng live-in partner niya ng mag-asawang Konsehal Alfred Vargas at Yasmine Espiritu dahil sa umano’y pambu-bully ng 8-year-old nilang anak sa kaedad din nitong anak namang lalaki nina Alfred at Yasmine.

Nakausap namin si Rob sa storycon ng uumpisahan palang na i-shoot na movie ni Direk Jose “JR” Olinares, Jr. na Roots of Contagion.

Isa si Rob sa cast ng psychological/suspense horror, thriller movie na pagbibidahan nina Kate Yalung, John Arcenas, Althea Ablan at Abdul Rahman, kasama ang mga supporting stars na sina Jeffrey Santos, Dindo Arroyo, Lovely Rivero, Sharmaine Suarez, Ramon Christopher Gutierrez at Valerie Concepcion.

Simula ni Rob, ayaw na niyang magbigay ng detalye kung ano ang pinag-ugatan ng kaso dahil nasa korte na ito at nakapagbigay na rin sila ng kanilang panig o salaysay, bagama’t hindi pa raw sila umaabot nina Konsehal Alfred sa mediation o arbitration.

Pero kinumpirma niya na open sila ng kanyang live-in partner sa pakikipag-ayos dahil inamin ni Rob na bago pa ang pagsasampa ng kaso ng mag-asawang Vargas ay nagsimula naman pala silang magkakaibigan.

Mula raw nang magsimula ang kani-kanilang anak sa pag-aaral ng swimming ay magkakaibigan na sila. In fact, kapag nagkikita nga raw sila ni Alfred, “Brother” pa ang tawagan nila at ipinagmamalaki rin daw ng konsehal sa ibang kakilala nila na paborito siya nito bilang kaibigan.

Ninang din daw ng isang anak nina Alfred at Yasmine ang live-in partner niya, patunay kung gaano sila ka-close noon.

Kaya masakit din daw sa kanya ang nangyari, na hindi naman daw maikuwento pa sa amin ni Rob kung ano talaga ang totoong naganap kaya umabot sa demandahan dahil nasa korte na nga ito ngayon.

Basta ipinagdarasal na lang daw niya na matapos na ito dahil hindi rin madali ang pinagdaraanan ng kanyang pamilya, kung saan maging ang kanyang 8-year-old na anak ay nabu-bully din kapag nasa public place sila tulad kapag nagsisimba dahil may mga nakakakilala sa kanya at itinuturo ang kanyang anak na siya diumanong nang-bully sa anak ni Konsehal Alfred.

Nagpapasalamat na lang si Rob Sy dahil sa kabila ng isinampa sa kanyang kaso, hindi naman naaapektuhan ang kanyang showbiz career. May mga patuloy pa ring nagtitiwala sa kanya tulad ni Direk JR Olinares na isinama nga siya rito sa Roots of Contagion.

Ang Roots of Contagion ay isang advocacy film na produced ng Letran Calamba na tungkol sa mysterious botanical threat at sa "chilling conspiracy" na tumatalakay sa risk sa public health and hygiene.

Nakatakda itong ipalabas sa September 30 at may premiere night daw sa Sept. 26. 

---

BLUE DREAMERS PH, DREAM MAGING GLOBAL PERFORMERS

• 

  Blue Dreamers PH

Ang mga hindi magandang karanasan sa buhay na nagtulak sa kanila para mangarap ang dahilan kaya Blue Dreamers PH ang itinawag sa grupo ng mga kabataang binubuo ng 5 miyembro – ang kambal na sina Xanxan at Jairex (18 yrs. old), ang parehong 17-year-old na sina Jarred at Zhian at ang only girl na si Shayne (21 yrs. old).

Nu’ng June 2025 pa unang ini-launch ang grupo na pare-parehong marunong kumanta at sumayaw. Nabuo ang grupo mula sa audition sa iba’t ibang parte ng Pilipinas. 

Sa dinami-dami ng nag-audition, ang 5 ang napili matapos silang itira sa isang bahay na mala-PBB house kung saan sinanay sila sa pagkanta, pagsasayaw, pag-arte at pagmo-model.

No wonder na nang iharap sa entertainment press ang Blue Dreamers PH ay magagaling na silang mag-perform at puwede nang maipagmalaki at ilaban kahit sa global market.

Maging ang mga hitsura nila na may appeal na hindi purong Pinoy kundi may pagka-Chinese ay pak na pak at tiyak na malakas din ang dating sa mga fans.

Ngayon pa lang, tinitiyak na ng Blue Dreamers PH na career ang priority nila at desidido silang sumikat hindi lang dito sa atin kundi maging globally dahil ayon sa kanilang manager, bawal muna sa kanila ang love life para hindi masira ang kanilang career.

Sa ngayon, patuloy nilang ipinakikilala at ipino-promote ang kanilang mga kantang Lowkey Tayo at Dance Tayo (ft. Blue Dreamers Boys) at 912 Hours Journey (ft. Shayne Monreal at Zhian Mendaza).

Available na ang Lowkey Tayo sa lahat ng streaming platforms worldwide. Distributed ito ng Artist Central Music at ang lyrics and music ay mula kay Marko Jhon Gutierrez.