ni Atty. Persida Rueda-Acosta - @Magtanong Kay Attorney | May 17, 2021
Dear Chief Acosta,
Kinasuhan ko ang aking kapitbahay ng Grave Threats at nahatulan na guilty ng
trial court. Nag-apply siya ng probation at inaprubahan naman ito. Ngunit, isang linggo
pa lamang ang nakalilipas matapos nito, nagsimula na naman siyang manggulo sa
amin hanggang nagkapisikalan na sila ng aking asawa. Ni-report namin ito sa mga
pulis at siya ay inaresto. Nais ko sana siyang kasuhan ng physical injuries. Ano ba
ang dapat kong gawin? – Princess
Dear Princess,
Ang unang hakbang na inyong dapat gawin ay ang pag-report ng naturang insidente sa
probation officer na nagsu-supervise sa inyong kapitbahay. Ayon sa Section 11 ng Presidential
Decree (P.D.) No. 968 o Probation Law na inamyendahan ng Republic Act (R.A.) No. 10707,
kapag nilabag ng probationer ang alinman sa mga kondisyong nakapaloob sa probation order o
kaya naman ay gumawa na naman siya ng panibagong krimen, siya ay maaaring arestuhing muli
at ikulong upang pagdusahan niya ang kaparusahan na ipinataw sa kanya sa krimen na
pinagkalooban siya ng probation, viz:
“Section 11. Effectivity of Probation Order. A probation order shall take
effect upon its issuance, at which time the court shall inform the offender
of the consequences thereof and explain that upon his failure to comply
with any of the conditions prescribed in the said order or his commission
of another offense, he shall serve the penalty imposed for the offense
under which he was placed on probation.”
Base sa inyong kuwento, malinaw na ang ginawang panggugulo ng inyong kapitbahay na
humantong sa pisikalang pag-aaway ay paglabag sa Section 11 ng P.D. No. 968, na nakapaloob
sa kaniyang probation order sapagkat ito ay maituturing na paggawa ng panibagong krimen.
Dahil dito, siya ay kinakailangang arestuhin ng kaniyang probation officer sa bisa ng warrant of arrest upang muling humarap sa korte para sa isang informal at summary hearing na kung saan ay aalamin kung mayroon nga bang naging paglabag. Bukod dito, maaari mo pa rin siyang kasuhan ng Physical Injuries dahil sa pananakit na ginawa niya sa inyong asawa.
Nawa ay nasagot namin ang inyong mga katanungan. Nais naming ipaalala sa inyo na
ang opinyong ito ay nakabase sa inyong mga naisalaysay sa inyong liham at sa pagkakaintindi
namin dito. Maaaring maiba ang opinyon kung mayroong karagdagang impormasyong ibibigay.
Mas mainam kung personal kayong sumangguni sa abogado.
Maraming salamat sa inyong patuloy na pagtitiwala.