Ekslusibong karapatan ng empleyado sa pagtanggap ng suweldo

ni Atty. Persida Rueda-Acosta - @Magtanong Kay Attorney | September 06, 2021

Dear Chief Acosta,

Ang aking asawa ay hindi regular na nagbibigay ng sustento sa aming mga anak kahit siya ay may trabaho sa pribadong kumpanya. Madalas siyang mangako na siya ay magbibigay ng panggastos, ngunit hindi ito nangyayari. Bilang kanyang asawa, maaari ba na makipag-ugnayan ako sa pamunuan ng kanyang pinapasukang trabaho, upang ibigay nang direkta sa akin ang bahagi ng kanyang suweldo? - Sandra

Dear Sandra,

Ang batas na sasaklaw tungkol sa inyong katanungan ay ang Presidential Decree No. 442 o ang Labor Code of the Philippines, at ang kaakibat nitong Implementing Rules and Regulations. Nakasaad sa Article 105 ng nasabing batas na:

“Article 105. Direct payment of wages. Wages shall be paid directly to the workers to whom they are due, except:

In cases of force majeure rendering such payment impossible or under other special circumstances to be determined by the Secretary of Labor and Employment in appropriate regulations, in which case, the worker may be paid through another person under written authority given by the worker for the purpose; or

Where the worker has died, in which case, the employer may pay the wages of the deceased worker to the heirs of the latter without the necessity of intestate proceedings. The claimants, if they are all of age, shall execute an affidavit attesting to their relationship to the deceased and the fact that they are his heirs, to the exclusion of all other persons. If any of the heirs is a minor, the affidavit shall be executed on his behalf by his natural guardian or next-of-kin. The affidavit shall be presented to the employer who shall make payment through the Secretary of Labor and Employment or his representative. The representative of the Secretary of Labor and Employment shall act as referee in dividing the amount paid among the heirs. The payment of wages under this Article shall absolve the employer of any further liability with respect to the amount paid.”

Samantala, nakasaad sa Book Three, Rule VIII ng kaakibat nitong Implementing Rules and Regulations na:

“SECTION 5. Direct payment of wages. — Payment of wages shall be made direct to the employee entitled thereto except in the following cases:

Where the employer is authorized in writing by the employee to pay his wages to a member of his family…xxx” (Binigyang-diin)

Malinaw na nakasaad sa batas na ang suweldo ng empleyado ay marapat na ibigay sa kanya lamang. Gayunman, ang sinumang miyembro ng pamilya ng nasabing empleyado ay maaaring tanggapin ang kanyang suweldo, alinsunod sa mga alituntunin na itinalaga sa batas. Kaugnay nito, kinakailangang bigyang karapatan ng empleyado ang miyembro ng kanyang pamilya na tanggapin ang kanyang suweldo. Nakasaad din sa batas na ang empleyado ay kinakailangang sumulat sa employer, na kung saan, inilalahad niya na pinahihintulutan ang partikular na miyembro ng kanyang pamilya na tanggapin ang kabuuuan o bahagi ng suweldo niya. Ang nasabing sulat ay marapat na isumite ng empleyado sa employer.

Samakatwid, ang suweldo ng empleyado ay eksklusibo niyang matatanggap, liban lamang kung kaniyang pahihintulutan ang sinumang miyembro ng kaniyang pamilya na tanggapin ito.

Nawa ay nasagot namin ang inyong mga katanungan. Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa isang abogado.

Maraming salamat sa inyong patuloy na pagtitiwala.