ni VA @Sports | March 14, 2023
Tinapos ng Filipino gymnast na si Carlos Yulo ang kanyang kampanya sa third leg ng FIG Artistic Gymnastics World Cup Series na may double gold nang maghari rin ito sa vault finals sa pagtatapos ng kompetisyon noong Linggo sa Baku, Azerbaijan.
Sumandig sa nakuha nyang momentum mula sa pagkapanalo ng gold sa parallel bars noong Sabado, nagtala ng iskor na 14.933 si Yulo upang mangibabaw sa 8-man field at angkinin ang gold medal sa vault finals.
.
Tumapos namang pangalawa sa kanya si Great Britain gymnast Harry Hepworth na nagtala ng 14.816 puntos para sa silver kasunod si Shek Wait Hung ng Hong Kong na inuwi ang bronze sa naiposte nitong 17.716 puntos. Bumagsak naman sa ika-4 na puwesto ang top qualifier na si Mahdi Olfati ng na makaiskor ng 14.399 puntos. Kung susumahin, impresibo ang ipinakitang performances ni Yulo sa unang tatlong legs ng World Cup Series at ang katatapos na Baku leg ang maituturing na pinakamahusay.
Sa ngayon ay mayroon ng natipon si Yulo na tatlong golds, isang silver at dalawang bronzes sa ginaganap na World Cup Series. Magkakaroon ng pagkakataong magpahinga si Yulo bago muling sumabak sa fourth at huling leg ng series na idaraos sa Abril 27-30 sa Cairo, Egypt.