Dolly De Leon, taob! RUBY RUIZ, BIDA SA INTERNATIONAL FILM

ni Julie Bonifacio @Winner | October 10, 2023

Kakabugin ng character actress na si Ruby Ruiz si Dolly de Leon with her upcoming international film na isu-shoot sa Pilipinas.

Si Ruby lang naman ang bida sa international film na ‘di pa niya puwedeng i-reveal ang titulo.

Sinabi naming kakabugin ni Ruby si Dolly dahil supporting role ang ginampanan niya sa Triangle of Sadness kung saan nanalo siya ng acting award internationally.

“I will play the lead po (nu'ng international film na isu-shoot next year),” pagbubulgar ni Ruby nu’ng mainterbyu namin after ng special screening for the entertainment media ng pinag-uusapang drama-series sa Prime Video, ang Linlang na pinagbibidahan nina Kim Chiu, JM de Guzman at Paulo Avelino.

At bago pa man ang A Very Good Girl nina Kathryn Bernardo at Dolly de Leon, nauna nang magkaroon ng lead role si Ruby sa indie film na Iska.

“Sa akin, natupad na po ‘yung dream ko na mag-lead (sa movie) nu’ng ginawa ko ang Iska. Masayang-masaya na po ako doon.

“Now, hindi naman po ako humahangad ng lead basta magagandang roles.

“If I’m given a chance to be a lead, why not? Pero kumbaga, na-ano ko na po ‘yun,” pahayag ni Ruby na gumanap bilang lola ni Kim sa Linlang.

And speaking of Kim, puring-puri ni Ruby ang aktres sa set ng Linlang.

Ani Ruby, “She’s very generous, not just to me but to all the cast. Sobra. Sobra. Napakabait po niya. At napaka-humble. Napakatotoo.”

Nagsimula nang ipalabas ang first two episodes ng Linlang sa Prime Video. Iikot ang kuwento ng serye kay Victor “Bangis” Lualhati (Paulo Avelino), dating boksingero na naging seaman, at sa kanyang pagtuklas ng katotohanan sa likod ng pagtataksil ng kanyang asawang si Juliana (Kim Chiu).

Kasama rin sa Linlang sina JM de Guzman, Kaila Estrada, Jake Ejercito, Albie Casiño Heaven Peralejo at Maricel Soriano.

Sina FM Reyes at Jojo Saguin naman ang mga direktor ng serye.

Anyway, napagkuwento namin si Ruby kung paano siya nakapagpapiktyur sa international actress na si Nicole Kidman sa set ng international series niya titled Expats na ipapalabas din sa Prime Video.

“Makapal kasi ang mukha ko, eh. Hindi. Ibinulong ko lang sa kanya. Sabi ko sa kanya, ‘Before I go back to the Philippines, I have only one request.’

“Sabi niya, 'What is it, Dear? What?’ Akala niya siguro, kung ano ‘yung ipapabili ko. Sana nga, nagpabili na lang ako ng bag. Ganoon,” sabay tawa ni Ruby.

Hindi na kinailangang dumaan pa si Ruby sa “red tape” ng production at team ni Nicole para makapagpapiktyur.

“She said, yes. So, everybody was, ‘Oh, she said yes to a picture with Ruby Ruiz,'” kuwento pa niya.