DepEd at LGUs, sama-samang tinutugunan ang classroom backlog

ni Kuya Win Gatchalian @Win Tayong Lahat | February 17, 2026

Matagal na nating problema ang kakulangan ng mga silid-aralan sa bansa. Taon-taon, ito ang bumubungad na hamon sa pagbubukas ng klase. Kaya naman ikinagagalak ng inyong lingkod ang paglagda ng Memorandum of Agreement (MOA) sa pagitan ng Department of Education (DepEd) at mga probinsya para sa isang nationwide classroom building program. 

Ang pagkakaroon ng kasunduang ito ay sang-ayon sa isang special provision ng 2026 national budget na nagpapahintulot sa DepEd na direktang makipag-ugnayan at makipagtulungan sa local government units (LGUs), pati na rin sa iba’t ibang ahensya at mga organisasyon, kabilang ang civil society organizations, non-governmental organizations, at Armed Forces of the Philippines (AFP) Corps of Engineers. Mahalaga ang pagtutulungan ng mga lokal na pamahalaan at mga ahensya upang mapabilis ang pagpapatayo ng mga kinakailangang silid-aralan.

Matatandaan ding naglaan ng P65.9 bilyon para sa pagpapatayo, pagpapalit, at pagkumpleto ng mga school buildings para sa kindergarten, elementary, at high school. Kasama rin sa popondohan ang mga technical-vocational laboratories na kailangan ng ating mga estudyante sa senior high school. Mas mataas ito sa P39 bilyon noong nakaraang taon. Inaasahang aabot sa 24,000 na mga silid-aralan ang maipapatayo gamit ang naturang pondo.

Ang hakbang na ito ay direktang tugon sa ulat ng Second Congressional Commission on Education (EDCOM II) na ang bansa ay mayroong malaking “classroom backlog,” kung saan kinakailangan pa natin ng 165,443 na silid-aralan para sa decongestion, replacement, at repair. Sa kasalukuyan, may mga paaralan sa bansa kung saan nagsisiksikan ang 75 hanggang mahigit 250 na mag-aaral sa iisang silid-aralan, bagay na nagreresulta sa pagpapatupad ng doble o tripleng shifts.

Binigyang-diin ng EDCOM II na kung ihahambing sa mga mag-aaral na nasa tamang class size, ang mga mag-aaral sa mga siksikang silid-aralan ay may mas mababang marka sa reading o pagbasa at mathematics.

Itinutulak ng EDCOM II, at sinusuportahan din ng inyong lingkod, ang paggamit ng “diversified construction efforts” o iba’t ibang paraan ng pagpapatayo, bilang bago at mas mabilis na estratehiya para masolusyunan ang kakulangan sa classroom na ilang dekada nang nagtatagal. Ang pakikipagtulungan sa mga LGUs ay isang makasaysayang pagkakataon upang mas mapabilis ang pagpapatayo ng mga gusali para sa ating mga mag-aaral dahil maaari nang sabay-sabay ang pagpapatayo ng mga gusali sa iba’t ibang panig ng bansa.

Ang pagkakaroon ng sapat na mga pasilidad ay isa sa mga pundasyon ng epektibong pag-aaral ng ating mga estudyante. Kaya naman sisiguraduhin natin na ang bawat pisong inilaan natin sa 2026 budget para sa sektor ng edukasyon ay mapupunta sa mas magandang kinabukasan ng ating mga mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com