Ang large-scale agricultural smuggling

ni Atty. Persida Rueda-Acosta @Magtanong Kay Attorney | August 18, 2025

Dear Chief Acosta,

Napanood ko sa balita ang patungkol sa pag-aangkat ng mga produktong pang-agrikultura na nagkakahalaga ng hindi bababa sa P10,000,000.00. May batas ba tayo patungkol dito na maaaring malabag kung ang nasabing pag-aangkat ay walang kaukulang clearance magmula sa gobyerno natin? Salamat sa inyo. -- Neq

---

Dear Neq,

Ang sagot sa iyong katanungan ay matatagpuan sa Section 7 ng Republic Act (R.A.) No. 12022, o mas kilala sa tawag na, “Anti-Agricultural Sabotage Act”, kung saan nakasaad na:

“Section 7. Agricultural Smuggling as Economic Sabotage. - Smuggling is the fraudulent act of importing or bringing of assisting and fishery products into the country, or the act of assisting in receiving, concealing, buying, selling, disposing, storing, or transporting such products, with full knowledge that the same have been fraudulently imported.

The crime of agricultural smuggling as economic sabotage is committed when the value of each or of the combination of agricultural and fishery products smuggled by a person is at least Ten million pesos (P10,000,000.00) computed using the DPI at the time the crime was committed.

Agricultural smuggling as used in this Act shall be committed through any of the following acts:

(a) Importing or bringing agricultural and fishery products into the Philippines without the required import clearance from regulatory agencies; x x x”

Batay sa nabanggit na batas, ang smuggling ay ang mapanlinlang na gawain ng pag-aangkat o pagdadala ng tulong at mga produktong pangisdaan sa bansa, o ang pagkilos ng pagtulong sa pagtanggap, pagtatago, pagbili, pagbebenta, pagtatapon, pag-iimbak, o pagdadala ng mga naturang produkto, na may ganap na kaalaman na ang mga ito ay mapanlinlang na inangkat. Ang krimen ng agricultural smuggling bilang economic sabotage ay ginagawa kapag ang halaga ng bawat isa o ng kombinasyon ng mga produktong pang-agrikultura at pangisdaan na ipinuslit ng isang tao ay hindi bababa sa P10,000,000.00 na nakalkula gamit ang daily price index sa oras na nagawa ang krimen.

Ang isa sa mga akto ng pagpupuslit ng agrikultura ay ginagawa sa pamamagitan ng pag-angkat o pagdadala ng mga produktong pang-agrikultura at pangisdaan sa Pilipinas nang walang kinakailangang clearance sa pag-angkat mula sa mga ahensyang nagtatakda ng regulasyon. Batay sa nabanggit, nararapat na makakuha muna ng kinakailangan na clearance kung mag-aangkat o magdadala ng produktong pang-agrikultura sa bansa dahil maaaring makonsidera itong krimen ng agricultural smuggling bilang economic sabotage kung ang halaga ng nasabing produkto ay hindi bababa sa P10,000,000.00.

Ang nasabing batas ay naaayon sa polisiyang isinusulong ng pamahalaan patungkol sa pagiging produktibo ng sektor ng agrikultura upang protektahan ang mga magsasaka at mangingisda mula sa mga walang prinsipyong mangangalakal at nag-aangkat, at tiyakin ang makatwiran at abot-kayang presyo ng mga produktong pang-agrikultura at pangisdaan para sa mga mamimili. Ito ay upang pigilan ang pagpupuslit ng mga produktong pang-agrikultura at pangisdaan, na negatibong nakaaapekto sa supply, produksyon, at katatagan ng presyo ng mga produktong pang-agrikultura at nagbabanta sa seguridad sa pagkain. Inaalis din ng ating pamahalaan ang akto ng pag-iimbak, profiteering, at kartel na labis na pumipigil sa supply at nagmamanipula ng mga presyo, para sa pag-unlad ng ating ekonomiya.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.