Concert, tuloy na tuloy… ALDEN, FEELING SOBRANG BLESSED KAHIT PANDEMIC

ni Nitz Miralles - @Bida | November 24, 2020

“Very excited and very nervous,” ang isasagot ni Alden Richards kapag kinumusta n'yo dahil sa December 8 virtual concert niyang Alden’s Reality. First virtual concert ito sa bansa at alam ni Alden at ng buong team na big risk ang kanilang ginawa.

Ang concern nina Alden at Director Paolo Valenciano, kung magugustuhan ng audience ang concert at kung tanggap na nila ang “new normal” na concert na sa bahay ka lang nanonood. Pero, in-assure ni Alden ang bumili ng tiket at manonood na magugustuhan nila ang Alden’s Reality na resulta ng hardwork ng buong team.

Kino-consider ni Alden na kasama sa blessings niya this year ang Alden’s Reality lalo na at 10th anniversary niya sa showbiz.

“Sobra akong blessed and grateful kahit maraming calamities. Kasama sa blessings sa akin ang concert na ito. Physically, it’s very exhausting. Exhausting. Body and soul, exhausted sa shoot. Challenge ito at gusto naming ma-challenge, at kahit mahirap gawin, sobrang proud kami sa ginawa namin,” sabi ni Alden.

Natanong si Alden kung ano ang concept ng kanyang concert at ano ang mai-expect ng bumili ng tiket na as of today, sold-out na ang VIP.

“Basically, everything that happened in 10 years ko sa showbiz ang mapapanood. Kaya pinush ko na matuloy ang concert na ito dahil sabi ko, parang hindi tama na palagpasin ang 10 years ko sa showbiz na wala kang ibibigay sa fans. This is a big deal for me and this is for the fans who supported me all these years.”

Nabanggit din ni Alden na very much involved siya sa Alden’s Reality at bago sila mag-shoot, nagkaroon muna ng five to six meetings to finalize everything. Thankful siya kay Direk Paolo na ginustong maging involved siya dahil ayaw nitong basta mag-perform na lang siya at susunod lang sa director.

Sa araw ng concert ni Alden, iri-release rin ang new single niyang I’m Going Crazy na collaboration ng GMA Music at Flip Music. Kaya, dalawa ang gift ni Alden sa kanyang mga fans sa anniversary niya sa showbiz.