Coach Baldwin, hanga kay Ramos sa Gilas stint

ni MC - @Sports | June 20, 2021

Pinuri ni Gilas Pilipinas coach Tab Baldwin si Dwight Ramos dahil sa ipinakita nitong husay sa paglalaro sa national team at sinabing para itong European player kung maglaro. Lumabas umano ang magandang laro at husay ng 6-foot-4 Ramos hindi lang sa third window kahit maging sa nakaraang windows kung saan ipinakita nito ang kanyang husay. "I think that the biggest surprise for me, not (only) looking today but looking at the tournament in Bahrain in the first game is Dwight Ramos," ayon kay Baldwin. "He’s looking like a European player, with size and (he's) very tough and athletic who can shoot the ball."

Totoo umanong nahuhubog ang 22-year-old na si Ramos bilang sandigan ng Gilas squad sa hinaharap. Sa laban ng Gilas kontra Indonesia, ipinakita ni Ramos na talagang maasahan ito dahil sa maganda nitong laro sa depensa at opensa. Nagtapos ito na may 10 points mula sa naipasok nitong 4-sa-12 na ibinato at kumana ng 12 rebounds at three steals. Sa huling laro kontra South Korea, kumana si Ramos ng team-high 16 markers kasama ang five rebounds at two steals sa makapigil-hiningang panalo ng Gilas, 81-78. Sa dalawang laro kontra Thailand sa second window, umiskor si Ramos ng 20 points at 13 points. "(He's) a really big prospect from Gilas," ayon kay Baldwin.

Samantala, nilinaw ng University of the Philippines na si Bo Perasol pa rin ang head coach ng University of the Philippines sa kabila ng reports na magbibitiw na ito sa kanyang pwesto o hindi na ni-renew ang kanyang kontrata.

Pinabulaanan ng UP officials ang lumabas na balita at sinabing ang veteran mentor pa rin ang may hawak ng Fighting Maroons at walang pagbabago sa status nito sa huling limang taon at susunod pang mga taon. “UP has formal processes in selecting varsity coaches. Right now, coach Bo is still the UP men’s basketball team head coach and he has not resigned," ani UP College of Human Kinetics dean Kiko Diaz. Matatandaang lumabas ang ulat na nag-resign na si Perasol at ipapalit sa kanya si dating NU Bullpups coach Goldwin Monteverde.