Certificate of Compliance mula sa Family Planning Office, kailangan

para sa pagkuha ng marriage licence

ni Atty. Persida Rueda-Acosta - @Magtanong Kay Attorney | April 1, 2022

Dear Chief Acosta,

Nais magpakasal ng aking anak at ng kanyang nobya sa lalong madaling panahon sapagkat mangingibang-bansa muna ang aking anak. Subalit nang sila ay kumukuha ng marriage license sa Local Civil Registrar, hindi sila binigyan nito dahil kinakailangan diumano muna nilang kumuha ng Certificate of Compliance mula sa Family Planning Office. Tama po ba ito?

Mel

Dear Mel,

Para sa inyong kaalaman, ang inyong suliranin ay tinatalakay sa Republic Act No. 10354 o The Responsible Parenthood and Reproductive Health Act of 2012. Nabanggit sa Section 15 ng nasabing batas na:

“Section 15. Certificate of Compliance. – No marriage license shall be issued by the Local Civil Registrar unless the applicants present a Certificate of Compliance issued for free by the local Family Planning Office certifying that they had duly received adequate instructions and information on responsible parenthood, family planning, breastfeeding and infant nutrition.”

Malinaw na nabanggit sa nasabing probisyon ng batas na hindi maaaring mabigyan ng marriage license ang mga aplikante kung wala silang maipakikitang Certificate of Compliance mula sa Family Planning Office na nagpapatunay na sila ay sumailalim na sa akmang pag-aaral at sila ay nabigyan na ng kaukulang impormasyon patungkol sa pagiging responsableng magulang, family planning, breastfeeding at infant nutrition.

Sana ay nabigyan namin ng linaw ang inyong katanungan.

Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.