ni VA - @Sports | March 21, 2023
Itinanghal ang mga Cebuanong sina Karen Andrea Manayon at Matthew Justine Hermosa bilang elite champions ng National Aquathlon Open and Super Tri Kids Championships na idinaos sa Ayala Vermosa Sports Hub sa Cebu noong Linggo.
Tinapos ng tubong Talisay na si Manayon ang 500m (swim) at 1.5km (run) race sa loob ng 17 minuto at 36 na segundo.
"I was not expecting to win but I have to do the work," wika ni Manayon. "I'm not really confident in swimming. I was having second thoughts so I gave it all in running."
Si Manayon ay bronze medalist sa sprint distance ng National Age Group Triathlon Series na ginanap sa Subic Bay noong nakaraang Enero.
Nangibabaw naman si Hermosa sa men's side matapos maorasan ng 15 minuto at 36 na segundo.
Nagtapos siyang pangalawa sa men's side ng nakaraang National Age Group Triathlon series kasunod ng nagkampeong si Filipino-Spanish Fernando Jose Casares.
Samantala, nagsipagwagi naman sina Dayshaun Ramos at Moira Frances Gabrielle Erediano sa junior elite category ng torneong inorganisa ng Triathlon Association of the Philippines (TRAP) at magkakatulong na itinaguyod ng Asian Centre for Insulation Philippines, Inc., Standard Insurance at ng Philippine Sports Commission.
Naorasan si Ramos ng 15:54 habang nagtala naman ng 19.54 ayon sa pagkakasunod.
Ang iba pang mga nanalo ay sina Darell Johnson at Sinagtala Cuevas (Youth 13-15); Pio Mishael Latonio at Maria Isabella Raagas (11-12); Julio Luis Malaluan at Jovie Yzelle Calisog (9-10); Richard Navo III and Athena Masadao (7-8) at Brisbane Ledesma (boys 6 years old and under).