Best Actor ng MMFF 2023… CEDRICK, GUSTONG MA-TESTING SI KATHRYN

ni Julie Bonifacio @Winner | December 30, 2023

Big winner sa Gabi ng Parangal ng 2023 Metro Manila Film Festival ang theater actor na si Cedrick Juan pagkatapos niyang masungkit ang Best Actor award.  

Tinalo lang naman ni Cedrick sina Alden Richards (A Family of Two), Piolo Pascual (Mallari), Dingdong Dantes (Rewind), Derek Ramsey ((K)ampon), at Christopher de Leon (When I Met You In Tokyo) sa Best Actor category.

Nanalo si Cedrick para sa pagganap niya bilang si Jose Burgos sa GomBurZa na idinirek ni Pepe Diokno. 

Nakausap namin si Cedrick pagkatapos ng awards night sa loob ng New Frontier Theater last Dec. 27.

Sobrang overwhelming para kay Cedrick ang pagkakapanalo niya.

“Isipin mo (na) maisama ka sa line-up ni Mr. Piolo, Mr. Christopher, ni Derek Ramsay, Dingdong Dantes na alam natin na mga pillars na ng Philippine industry at ng Philippine entertainment industry. And through the years of experience, grabe na ang maturity nila. As you can see kanina, grabe ang stuttering ko, grabeng iyak ko.     

“As much as possible, I wanna compose myself. Pero ‘yun nga, nakalimutan ko pang pasalamatan lahat ng gusto kong pasalamatan. But I will do that when I post it.

“Overwhelming siya kasi at least, naramdaman ko na isa siyang appreciation, recognition and affirmation sa sampung taon na ipinaglaban ko ‘yung pagmamahal ko sa pag-arte, paglikha at pagtatrabaho ko bilang isang artist ng Pilipinas,” pahayag ni Cedrick.

Paul Cedrick Gutierrez Juan ang kumpletong pangalan niya at ipinanganak sa Santa Maria, Bulacan, Philippines.

Nagtapos siya with a Bachelor of Arts degree in Mass Communication from Far Eastern University, Manila, Philippines.

Bukod sa GomBurZa, nagbida na rin si Cedrick sa Two and One (2022) at may natapos na rin siyang pelikula na Gitarista ang titulo pero ‘di pa naipapalabas.

Napanood din siya sa mga pelikulang Die Beautiful (2016), Oro (2016), Bliss (2017), The Panti Sisters (2019), Utopia (2019), Kalel, 15 (2019), Big Night! (2021) at Huling Palabas sa Cinemalaya this year.

Tinanghal bilang 2nd Best Picture ang pelikula ni Cedrick na GomBurZa. Tinalo sila ng Firefly for Best Picture.

“Sobrang laking bagay na noon kasi lahat ng sampung pelikula, sobrang ang gaganda.

Nagke-cater ng bawat tradisyon, ng culture nating mga Pilipino.

“Uhm, ano, ‘yung second Best Picture, ano ‘yun, eh, dream na rin halos lahat ng mga pelikula. Kasi hindi lahat, nabibigyan ng ganoong opportunity.

“So, sobrang pasasalamat. Sobrang pagiging grateful. For sure, the whole cast and Pepe (Diokno) and (producers ng movie), eh, thankful na doon sa recognition na second Best Picture kasi hindi rin namin ine-expect ‘yung mga bagay-bagay talaga.”

Isa sa wishlist ni Cedrick na makatrabaho ay si Kathryn Bernardo.

“Ay, yeah,” ngiti niya. “Kasi last time I watched A Very Good Girl, sobrang galing nila ni Tita Dolly (De Leon). Yeah, kung magkakaroon ng pagkakataon, why not?”

Marami pang gustong gawing pelikula si Cedrick.

“Marami pa akong hindi nagagawa,” saad niya.

“Actually, ang weakness ko, comedy. Hindi pa ako nakakagawa ng comedy. Horror, hindi pa yata ako nakakagawa ng horror.

“Depende siguro kung ano ang maibibigay ng mga productions na sobrang challenging na makakatulong sa nation building din.”

Ayon pa kay Cedrick, freelance actor siya ngayon. And next year, may bagong TV series siya na gagawin.

“Uh, 2024 I will be doing a series. But I can’t tell it for now.

“Movie? Wala pa po.

“Series po muna sa ngayon. Tingnan po muna natin kung ano ang papasok. Kasi sobrang nakakagulat pa po ang lahat.”

Hindi na kaya siya tatanggap ng supporting roles after manalo ng Best Actor award?

“Uh, no, no. Para po sa akin, I’ve been doing supporting roles for the past ten years and it doesn’t matter to me. Kasi po, isa po ulit na kasabihan namin sa theater na, 'There’s no small roles, only small actors.'

“So, kung ano ang nand’yan, as long as naibibigay ‘yung justice and everything.”

What about doing sexy roles gaya ng ginawa niya sa Vivamax movie na Two And One?

“Oh, my God! Let’s see about the script. I always wanna work with the script first before accepting a role,” pagtatapos ni Cedrick.