BARON, IBINUKING NG MISIS NA NASA SAFE PLACE

ni Beth Gelena @Bulgary | September 27, 2026

Photo: IG _baron.gesler

Nagbigay ng update si Jamie Evangelista tungkol sa kalagayan ng kanyang mister na si Baron Geisler at nagpasalamat sa mga taong patuloy na nag-aalala, nananalangin at nagbibigay ng suporta sa aktor.

Sa isang mensaheng ibinahagi niya sa Instagram (IG) Stories, sinabi ni Jamie na nagpapasalamat siya sa mga taong patuloy na kumukumusta kay Baron.

“To everyone who has genuinely reached out and expressed concern for Baron, thank you for your prayers, love, and concern,” saad ni Jamie.

Hindi na nagbigay ng karagdagang detalye si Jamie tungkol sa partikular na sitwasyong pinagdaraanan ng kanyang mister. Gayunman, sinabi niyang kasalukuyang nasa ligtas na lugar si Baron upang matanggap ang suportang kailangan niya.

“Baron has sought refuge in a safe place where he can receive the support and care he needs. Please allow him the time and space to heal and find his way back to his best self again,” dagdag pa niya.

Dahil dito, hiniling ni Jamie sa publiko na bigyan si Baron ng sapat na panahon habang nagpapatuloy ang kanyang recovery.

Binigyang-diin din ni Jamie na hindi dapat tingnan bilang usapin ng kahihiyan o panghuhusga ang pinagdaraanan ng aktor. Para sa kanya, mas mahalaga ang pagkakaroon ng pang-unawa at tamang suporta para sa mga taong dumaraan sa ganitong pagsubok.

“This is not about shame or judgment. It is about awareness, compassion, and recognizing that addiction and mental health struggles require proper help and treatment,” aniya.

Hindi naman tinukoy ni Jamie kung anong partikular na treatment o support ang kasalukuyang natatanggap ni Baron.

“Asking for help is not weakness, and recovery is possible,” saad niya.

Sa pagtatapos ng kanyang mensahe, hiniling ni Jamie sa publiko na igalang ang privacy ni Baron at ng kanilang pamilya habang nagpapatuloy ang recovery ng aktor.

“Please respect his privacy and continue to keep him and our family in your prayers,” pagtatapos niya.

Bago ang mensahe ni Jamie, naging paksa rin ng online discussion ang social media activity ng mag-asawa matapos mapansin ng ilang netizens na tila hindi na sila nagpa-follow sa isa’t isa sa IG.

Gayunman, may mga netizens ding nagpaalala na hindi dapat agad gumawa ng konklusyon tungkol sa personal na buhay ng mag-asawa batay lamang sa kanilang social media status.

Samantala, ilang araw bago ang pahayag ni Jamie, nagbahagi rin si Baron ng babala tungkol sa umano’y scam na nagpapanggap bilang fan. Nagpaalala siya sa kanyang mga followers na maging maingat sa mga random na tawag at mensahe.

---

KIM, SUPORTADO NG UTOL NA SI TWINKLE LABAN KAY LAKAM

Muling nagpakita ng suporta si Twinkle Chiu sa kanyang kapatid na si Kim Chiu habang nagpapatuloy ang legal na usapin sa pagitan ng aktres at ng kanilang panganay na kapatid na si Lakambini ‘Lakam’ Chiu.

Sa Instagram (IG) Story, ibinahagi ni Twinkle ang lumabas sa One Publicity PH na nagpapahayag ng pakikiisa kay Kim, sa House of Little Bunny Philippines, Inc. (HOLB), mga empleyado nito at iba pang naging bahagi ng negosyo.

Sey sa post, “May truth, justice, and accountability prevail as we continue to pray for Ms. Kim, the company, and everyone affected by this matter.”

Wala nang mahabang sariling pahayag si Twinkle at sa halip ay ibinahagi lamang ang naturang mensahe.

Ang suporta niya ay kasunod ng pagdalo ni Kim sa arraignment ni Lakam sa Quezon City Hall of Justice noong Setyembre 24. Kaugnay ito ng 124 counts ng qualified theft na isinampa laban kay Lakam, na dumalo sa pamamagitan ng video conferencing at nag-plea ng “not guilty”.

Ayon sa legal counsel ni Lakam na si Atty. Dominic Solis, haharapin ng kanilang kliyente ang kaso sa pamamagitan ng tamang legal na proseso.

Patuloy na dinidinig sa korte ang kaso laban kay Lakam habang nananatiling maingat sa kanilang mga pahayag ang magkabilang panig dahil sa nagpapatuloy na proseso sa korte.