Apela sa Professional Regulation Commission (PRC)

ni Atty. Persida Rueda-Acosta - @Magtanong Kay Attorney | August 16, 2021

Dear Chief Acosta,

Isa akong rehistradong chemical technician at nakatanggap ako ng desisyon mula sa Professional Regulatory Board of Chemistry tungkol sa kasong administratibo laban sa akin. Ilang araw ba ang ibinibigay ng batas upang iapela ko ito? - Paulene

Dear Paulene,

Para sa inyong kaalaman, ang batas na sumasaklaw sa inyong katanungan ay ang Section 7 (k) ng Republic Act No. 10657 na mas kilala bilang ”Chemistry Profession Act”. Nakasaad sa nasabing probisyon ang sumusunod:

“Section 7. Powers and Duties of the Board. – The Board shall have the following powers and duties: xxx (k) Hear and decide administrative cases filed against chemists, chemical technicians, and the owners and administrators of chemical laboratories. The hearing shall be presided over by the Chairperson or a member of the Board with the assistance of an attorney of the Commission. Any decision shall be decided by a majority of the Board. The decision of the Board may be appealed to the Commission not later than the fifteenth (15th) day from notice; otherwise, such decision shall be final and executory; xxx”

Ibig sabihin, isa sa mga kapangyarihan ng Professional Regulatory Board of Chemistry ang pagdinig at magpasya sa mga kasong administratibo na isinampa laban sa mga chemists, chemical technicians, at mga may-ari at administrators ng mga chemical laboratories. Ang pagdinig ay pangungunahan ng Chairperson o isang miyembro ng Board kaakibat ng abogado mula sa Professional Regulation Commission (PRC). Ang anumang desisyon ay dapat mapasyahan ng majority ng Board. Ang desisyon ng Board ay maaaring iapela sa PRC sa panahong hindi lalampas sa ikalabing-limang (15) araw mula sa notice; kung hindi, ang naturang desisyon ay magiging final and executory. Sa inyong sitwasyon, binibigyan kayo ng batas ng labing-limang (15) araw mula sa pagkatanggap ninyo ng notice ng desisyon mula sa Professional Regulatory Board for Chemistry hinggil sa inyong kaso upang makapag-apela sa PRC. Kung hindi ninyo ito magagawa sa nasabing panahon, magiging final at executory na ang naturang desisyon, at hindi na ninyo ito maaaring kuwestiyunin pa.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.