Ang ibig sabihin ng “jurisdiction” ng korte

ni Atty. Persida Rueda-Acosta @Magtanong Kay Attorney | Oct. 12, 2024

Dear Chief Acosta,

Palagi kong naririnig at nababasa ang salitang ‘jurisdiction’ kapag pinag-uusapan ang mga kaso sa korte. Ano ba ang ibig sabihin ng ‘jurisdiction’?  — Koi

---

Dear Koi,

Ang konsepto ng ‘jurisdiction’ o hurisdiksyon ay tumutukoy sa kapangyarihan ng isang korte na dinggin, litisin, at desisyunan ang isang kaso. Ito ay sang-ayon sa kaso ng Cuenca vs. PCGG, G.R. Nos. 159104-05, 05 October 2007, kung saan sinabi ng Korte Suprema, sa pamamagitan ni Kagalang-galang na Kasamang Mahistrado Presbitero Velasco, Jr. na:

“Jurisdiction is defined as the power and authority of a court to hear, try, and decide a case.  Jurisdiction over the subject matter is conferred by the Constitution or by law while jurisdiction over the person is acquired by his/her voluntary submission to the authority of the court or through the exercise of its coercive processes. Jurisdiction over the res is obtained by actual or constructive seizure placing the property under the orders of the court.”

Malinaw na ang konsepto ng hurisdiksyon ay tumutukoy sa kapangyarihan ng korte na dinggin ang isang kaso at ito ay itinatakda ng Konstitusyon o ng batas. Ito ay maaaring tumukoy sa ‘subject matter’ o isyu na inilalapit sa korte, o hurisdiksyon ukol sa tao o bagay.

Ito ay mahalagang konsepto sapagkat ang bawat korte ay ginagawaran ng kani-kanyang kapangyarihan upang duminig ng kaso. Ang isang korte na walang hurisdiksyon patungkol sa isyu na inilalapit dito ay hindi maaaring duminig ng nasabing kaso. Gayundin, ang hurisdiksyon ukol sa tao o bagay na pinatutungkulan ng nasabing kaso, kung walang hurisdiksyon ang korte sa tao o bagay, hindi nito maaaring dinggin ang kaso.  

Kung ang isang korte na walang tamang hurisdiksyon ay didinig sa isang kaso, ang lahat ng magaganap na pagdinig, kahit ang magiging desisyon, ay walang bisa at magreresulta ito sa terminasyon ng kaso, alinsunod sa desisyon ng ating Korte Suprema:  

“As the Court held in Bilag v. Ay-ay, ‘x x x any act that [a court] performs without jurisdiction shall be null and void, and without any binding legal effects.’ It is also well established that ‘the decision of a court or tribunal without jurisdiction is a total nullity. A void judgment for want of jurisdiction is no judgment at all. All acts performed pursuant to it and all claims emanating from it have no legal effect.’ The dismissal of the case, thus, follows as a necessary consequence.” Non v. Office of the Ombudsman, G.R. No. 251177, September 08, 2020, J. Reyes, Jr.)

Sana ay nabigyan namin ng linaw ang iyong katanungan.  Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.