Ang aktres daw talaga ang nagbayad ng costume… RESBAK NG KAMPO NI BEA: PRODU NG MOVIE NA 1521,

SINUNGALING

ni Julie Bonifacio @Winner | October 09, 2023

Pinasinungalingan ng manager ni Bea Alonzo na si Shirley Kuan ang mga negatibong akusasyon sa alagang aktres ng producer ng international film na 1521 na si Francis Ho.

Pinadalhan kami ni SK, tawag sa kanya sa showbiz, ng video ng exclusive interview nya sa PEP.ph at doon ay nilinaw niya na paninira lamang ang mabibigat na bintang kay Bea gaya ng “unreasonable demands and expectations" kahit wala raw sa kontrata.

Dagdag pa rito ang patutsada ng kampo ng producer ng 1521 sa pagtanggi raw ni Bea na i-promote ang pelikula.

Hindi kami pamilyar sa buong kuwento ng isyu sa pagitan ni Bea at ng produksiyon ng 1521. But based on what we’ve seen sa video, feeling namin, nag-ugat ang lahat sa wardrobe ni Bea sa movie.

Nagsalita kasi ang producer nito sa isang online newspaper at inakusahan si Bea na siya ang dahilan kaya siya rin ang nagbayad ng costume niya sa pelikula.

Buwelta ni SK, ‘di totoo ang sinabi ng producer at production designer ng 1521 na sila ang nagbayad ng original costume ni Bea at nagkaaberya nang hindi sumipot ang aktres sa schedule ng fitting ng costume bago nagsimula ang produksiyon.

And then, gusto raw ni Bea na i-redesign ang costume according to her style. Gusto pa raw ni Bea na ang sarili niyang mananahi ang gumawa ng costume niya at ayaw niyang ipagawa sa mananahi na kinontak ng production designer na si Francisco Nebres o si Nono. Kaya ang ending, si Bea na ang nagbayad ng repair.

Isang young fashion designer mula sa Bicol ang gumawa ng "warrior costume (with double)" at "princess costume" para sa isang eksena ni Bea sa pelikula.

Less than a week before ng shoot sa Palawan which was on August 1, ipinadala kay Bea ang litrato ng costume niya sa movie and not the actual wardrobe.

Esplika ni SK, “Kung hindi pa kami nag-request, 'di niya ipinadala. Photos pa lang, dahil ini-request ng office ko, 'Patingin man lang, hindi pa namin nakikita ano’ng hitsura ng costume, lilipad na si Bea.'

"So, hindi totoo 'yung one month before na (schedule ng fitting)," diin ni SK.

July 26, 2022, lumuwas daw mula Bicol patungong Manila ang fashion designer na gumawa ng costume ni Bea, at personal na idineliber ang tatlong costumes na gagamitin ni Bea.

Ang siste, ang daming problema ng costume gaya na lang ng ‘di maisara ang zipper.

Dahil ayaw ni SK na magkaroon ng wardrobe malfunction si Bea during the shoot, sila na ang gumawa ng paraan to the point na sariling pera na ng aktres ang ginamit sa pagpapagawa ng kanyang costume sa movie.

Sa kabilang banda, nakita namin ang post sa Facebook account ng PD na si Nono.

Bahagi ng post ni Nono, “We also commissioned a young designer from Camarines Norte/Bicol, my hometown. The fashion designer made 2 warrior/Diwata costume (w/ double) & a princess costume for her dance number in the "Piging". We also requested him to personally fit the costume to Bea a month b4 filming. A week before pullout to Palawan, I was informed that there was alterations of the costumes fr her stylist w/ the reasons that it doesn't fit her & we allow it for Bea's comfort...”

May netizen na nag-post sa comment section ng FB post ni Nono ng full interview ni SK sa PEP. At kasunod nito ang comment ng FB friends niya na nakapanood ng paglilinaw ni SK point-by-point sa isyu.

“Naku, teh, may mga resibo 'yung kampo ni Bea. Naku, sana 'yung mga nag-congrats sa 'yo, mapanood 'yung video sa YouTube. Ayun, oh, may nag-post na ng link. Sagutin mo 'teh, tutal, sabi nga ni Bernie Sarabia, first-hand witness ka daw. Nag-comment lang po.

“Nakakahiya ka. Ex-deal ang ginawa mo du'n sa young designer artist from Bicol. The poor kid had to fork out money for the fabrics. Mapagsamantala ka. Buti na lang Bea reimbursed him. The movie would have been supported by people but because of the production and people behind it, and what you did to Bey, no, thanks. I will make sure no one supports it. Mark my word. Now it is time for you, Nono, whoever you are, to provide proof na one month ahead, naipadala kay Bea ang costumes, and all your claims. You’re full of shit!”

‘Yun na!