ANDI, MAY TOPAK, TUMANGGING MAGPA-SELFIE SA MGA FANS

Erlinida Rapadas - @Teka Nga! | April 6, 2021

Naba-bash ngayon si Andi Eigenmann ng ilang fans na diumano'y tinanggihan niyang maka-selfie nang magtungo ang mga ito sa Siargao.

Dalawang beses daw na ginawa ni Andi ang pagtanggi sa mga fans kaya sumama ang loob ng mga ito sa anak ni Jaclyn Jose.

Dismayado ang mga fans sa inasal ni Andi. Akala raw nila ay mabait ito at down-to-earth tulad ng nakikita nila sa mga vlogs na napapanood nila sa YouTube.

Well, may paliwanag si Andi tungkol sa kanyang pagtanggi na magpa-selfie sa mga fans. Hindi raw niya inaasahan na hanggang sa kanilang bahay ay pupunta ang mga ito. Hindi naman kasi tourist spot na bahagi ng Siargao ang kanilang bahay kaya ini-expect niya na irerespeto naman ang privacy ng kanilang tahanan.

Aminado si Andi na tao lang din siya na minsan ay wala sa mood, lalo na't nagdaraan siya sa post-partum at wala sa kondisyon upang humarap sa mga tao.

Umaasa si Andi na maiintindihan siya ng mga fans. Hindi niya gusto ang magsungit at mang-isnab. Natiyempuhan lang ng mga fans na wala siya sa tamang kondisyon.

At sana, unawain din ng mga tagahanga na tao lang din ang mga artista na napapagod. Hindi sila robot na de-baterya. 'Wag namang maging demanding at balat-sibuyas ang mga fans.