Aktres, nag-unfollow sa BF, photos nila sa IG, binura na rin… HIWALAYANG HEAVEN AT MARCO, PINAGPIPISTAHAN

ni Nitz Miralles @Bida | June 2, 2025

Photo: Heaven at Marco - IG

Ano ba ‘yan? Katatapos pa lang ng breakup issue nina Julia Barretto at Gerald Anderson – na hindi naman totoo – sina Heaven Peralejo at Marco Gallo naman ang nababalitang hiwalay na. 

Ang basehan sa paniniwalang ito ay dahil in-unfollow ni Heaven si Marco sa Instagram (IG).

Deleted na rin daw sa IG ni Heaven ang mga photos nila ni Marco at ang itinira lang ay ang collab at endorsement nila. 

Napa-check tuloy kami sa IG nina Heaven at Marco at may photos pa nila na naka-post.

Mas maraming photo post nila ni Heaven sa IG ni Marco, so, ano ito?

Ang sabi ng mga fans, baka may LQ o lovers’ quarrel lang ang dalawa at mas nag-react si Heaven, kaya in-unfollow ang boyfriend. 

May naniniwala namang part lang ng promo ng show nila sa Viva ang pag-a-unfollow ni Heaven kay Marco. 

Ayun, may mga nainis tuloy na netizens dahil puwede naman daw mag-promote na hindi gagamitin ang kanilang relasyon.

Huwag din daw sabihing nagsimula nang mag-promote si Heaven ng movie nila ni Alden Richards na Out of Order (OOO) dahil wala pang schedule ang streaming nito sa Netflix. Saka, mababaw na dahilan ang project nina Heaven at Alden para maging rason ng breakup nina Heaven at Marco.

Gaya nina Gerald Anderson at Julia Barretto, malalaman natin ang totoo sa status ng relationship nina Heaven at Marco kapag na-interview ang isa sa kanila. 

Mas maganda nga, sabay silang ma-interview para malaman ang totoo.

---

Kinumpirma, ‘di pa sila break…

GERALD, INIHATID SI JULIA PA-DUBAI

Naaalala naming naisulat sa kolum na ito na hindi totoo ang nabalitang breakup nina Julia Barretto at Gerald Anderson. Dahil lang sa hindi sila spotted na magkasama sa ilang pagkakataon at wala ang aktor sa birthday party ng mom ni Julia na si Marjorie Barretto sa Boracay ay hiwalay na raw ang dalawa.

May ebidensiya na nga na hindi break sina Julia at Gerald dahil nakita sila sa NAIA Terminal 1. May netizen na nakakuha ng video nang ihatid ni Gerald si Julia sa airport dahil lumipad ang aktres pa-Dubai. Last Friday lang ‘yun at Monday pa lang ngayon, kaya wala pang nabago sa story.

Sa interview ni Toni Gonzaga kay Gerald sa vlog nito, itinanggi ng aktor ang breakup nila ni Julia. 

Aniya, “We’re okay at kanina nga, inihatid ko siya sa airport.” 

Itinanggi rin nito na nag-delete sila ng pictures sa Instagram (IG).

“Inuunahan ka nila. ‘Yun ang basehan ngayon, kung naka-follow ka o naka-unfollow ka.

Nakakalungkot ‘yun na ang basehan,” wika ni Gerald.

May nag-comment naman na kaya may ingay kay Gerald dahil sa June 23 na ang premiere ng new series niya sa Kapamilya Channel na Sins of the Father (SOTF). 

In fairness, kahit walang intriga sa love life ni Gerald, intriguing ang series na tungkol sa scamming na talamak ngayon.

---

79 na, todo-kayod pa rin… 

NOVA, UMAMING MAY ALZHEIMER’S NA

KUNG hindi sa mediacon ng Sanggang Dikit FR (SDFR), hindi pa malalaman na may Alzheimer’s disease ang veteran actress na si Nova Villa. 

Siya ang mismong nag-announce nito, pero mukhang nasa early stage pa lang, dahil kaya pa niyang magtrabaho.

“May Alzheimer na nga ako, but still going strong. I’m 79 years old na at awa ng Diyos, nandito pa rin tayo at nagtatrabaho in all channels. I’m still here. I can still memorize my script. Salamat at nandito pa rin tayo,” sabi ni Nova.

Idagdag na rin natin na magagandang projects pa rin ang dumarating kay Nova, pati mga roles na ginagampanan niya. 

Higit sa lahat, mahaba ang kanyang partisipasyon sa mga shows, gaya na lang sa

Pepito Manaloto (PM) na ilang taon na siyang mainstay.

Sa SDFR, gaganap si Nova bilang Lola Isang ng karakter ni Jennylyn Mercado. Mabait at hindi raw siya mabagsik na lola. 

“The same Nova Villa style,” ang tawag nito sa kanyang karakter.

Mas makikilala pa ng mga viewers si Lola Isang kapag pinanood ang action-comedy series na mula sa direction nina L.A. Madridejos at Kevin de Vela.