Aktor, 3 beses daw naligo at nag-scrub… SHARON, AMINADONG NAKAINOM BAGO NAGAWANG DILAAN ANG DIBDIB

NI MARCO

ni Ador V. Saluta - @Adore Me! | August 06, 2021

Isa sa mga inaabangang eksena sa pelikulang Revirginized ay ang tequila body shot ni Sharon Cuneta kay Marco Gumabao. Gagampanan ni Sharon ang role ni Carmela na nainlab sa mas bata sa kanya, si Morph played by Marco.

Sa tequila body shot, dinilaan ni Sharon ang asin sa dibdib ni Marco bago lumagok ng tequila.

Sa virtual presscon ng Revirginized nu'ng Miyerkules, sinabi ni Direk Darryl Yap na wala ito sa iskrip subalit idinagdag ito for publicity sake at dahil kinakailangan at mahalaga rin ang nasabing eksena para maipakita ang "marubdob" na ilusyon ni Carmela kay Morph.

Sa panayam kay Mega sa naturang mediacon, sinabi niyang natatawa siya sa eksena ng tequila body shot at nasabi niya kay Direk Yap na never pa niyang nagawa ang titillating scene na gaya nito sa kanyang ex na si Gabby Concepcion at maging sa kanyang asawang si Senador Kiko Pangilinan.

Pahayag ni Sharon, “Hindi ko kaya 'yung tequila! Hindi naman in my whole existence. Pero… 'yung diniretso kong ganu'n. Kasi, noon… I really don’t drink because I have an aversion to alcohol. I actually don’t understand bakit gusto ng tao 'yung alcohol. Pero 'yung tequila, tunay pala,” sey ng Megastar.

Ikinumpisal din ni Yap na hindi na niya nagawang makapagpaliwanag kay Mega para sa naturang eksena, pero sagot ng aktres, okay lang 'yun.

Katwiran ni Direk Darryl, “Alam ni Marco 'yun, hinahabol kasi natin ang araw.”

Sumagot naman si Sharon na alam din daw niya 'yun.

"I know! Ang galing ni Marco sa eksenang 'yun! Hindi ko kakayanin 'yun kung hindi sa guidance ni Marco.

“Kasi, noong nag-e-explain si Direk, naduduling ako. ‘Ha? Gagawin ko ‘to? Ha? Ha?!’ Nandoon pa ako, hindi pa ako nawawala.

"Heto na…kailangan nang mag-take, kasi tataas na 'yung araw. So, ‘Marco, you just carry me! I’ll just follow you! OK?!’ Ha! Ha! Ha! Ha!

“So, ginawa namin in one take. That was all in one take! Thank you! Thank you, Marco!

“Direk, that was a good take actually. Kinailangan ko! Nakatulong!” tuwang-tuwa at proud pang sabi ni Mega.

Bukod sa body shot scene, dapat din daw abangan ang shisha moment.

Hirit ni Sharon, “Direk, wala ngang lumalabas na usok doon sa shisha ko, eh. Ha! Ha! Ha! Ha! You know, Direk, meron naman akong vape, pero zero nicotine. Zero. Zero. Kesa ilagay ko rito, litson,” pagmuwestra ni Sharon sa bibig habang humahagikgik, “Eh, di vape. Puro flavor lang.

“Kesa kumain ako ng strawberry short cake, strawberry flavor na lang. Ganu'n! Pero Direk, grabe… grabeng experience.

“Lahat ng never ko pang nagawa! Ha! Ha! Ha! Pawie! Ha! Ha! Ha! Buti na lang, malinis sa katawan itong si Pawie! (tawag ni Sharon kay Marco)”

Sagot naman ni Marco, “Nag-scrub ako ng katawan noon, siyempre. Hindi puwedeng hindi. Naka-tatlong ligo ako before that take!”

Buwelta ni Sharon, “Ha! Ha! Ha! Pero enjoy na enjoy! Ha! Ha! Ha! Ha! Ang galing ko, grabe! Ginayd (guide) mo ako, grabe, hindi ko kakayanin 'yun.”

Ayon pa kay Marco, "Ang nakakatuwa roon, since the scene, siyempre, required na we're drinking so dapat method acting, ganyan.

“Eh, siyempre, it was our first scene together, 'di ba? So, sobrang kinakabahan talaga ako. Sabi ko, ‘Direk, OK lang ba kung mag-shot ako ng konting tequila? Pampagaan lang, pampa-boost lang.’

“Tapos, sabi ni Direk, ‘Sige, go! Gawin mo kung ano ang gusto mong gawin.’

“Tapos, I didn’t know na iyong tequila pala na iniinom ko, same tequila na ibinigay sa 'yo. So, nagulat ka na totoong tequila pala 'yun,” sabi ni Marco kay Sharon.

Sagot naman ni Sharon, “But I think, it was a good thing, Direk. It would have been so weird kung tubig 'yun. Tapos…

“I think it was a good thing for me doing the scene. Mabilis kasi akong tamaan ng alcohol. Nakatulong! Ha! Ha! Ha! Ha! Ha!” natatawang sambit ng Megastar.