After ng SB19 at BINI… MAYMAY AT BEN&BEN, TODO-ASANG MANO-NOMINATE SA GRAMMY AWARDS 2027

ni Vinia VIvar @Frankly | October 18, 2026

Photo: Maymay Entrata at Ben and Ben - IG

Umaasa rin sina Maymay Entrata at Ben&Ben na makakuha ng nominasyon sa upcoming Grammy Awards 2027 dahil kabilang sila sa mga nagsumite ng kanilang entries for consideration para sa nasabing prestihiyosong music awards.

Isinumite ng Ben&Ben ang reimagined version ng kanilang hit song na Leaves para sa Best Pop Group/Duo Performance category.

Sa social media, nagpaabot ng mensahe ang grupo sa kanilang loyal fans na kilala bilang Liwanag, kasabay ng pagbabahagi ng kanilang Grammy campaign.

“Suntok sa buwan, imposibleng pangarap, pero susubok pa rin! Salamat sa paglipad kasama namin, Liwanag,” saad ng banda.

Para sa Ben&Ben, isang malaking hakbang ang pagsubok na ito upang mas maipakilala ang kanilang musika sa mas malawak na audience sa labas ng Pilipinas.

Samantala, emosyonal naman ang naging reaksiyon ni Maymay matapos malaman na isinumite para sa Best Asian Pop Music Performance category sa Grammy ang kanyang awiting Masunog Man.

Ayon sa aktres at singer, may malalim na personal na kahulugan ang kanta dahil konektado ito sa lungkot at pangungulila na naramdaman niya matapos pumanaw ang kanyang ina.

“Woaaaah! Maraming salamat po!” masayang pahayag ni Maymay sa mga sumuporta.

“This song is very personal to me because it represents the grief I felt after my mom passed away,” pagbabahagi niya.

Aminado rin si Maymay na malaking bagay para sa kanya ang naturang pagkilala dahil pakiramdam niya ay mas nakikita at nauunawaan ang personal na kuwentong nasa likod ng kanyang musika.

“This makes me feel so seen. MARAMING SALAMAT PO for even the thought of considering our song, Masunog Man, for this incredible recognition!” dagdag pa niya.

Buong-puso rin niyang ipinahayag ang suporta sa OPM at sa mga kapwa Pilipinong patuloy na nangangarap na makilala sa buong mundo.

“Kasabay sa alon, bandera ng OPM ay babangon!” aniya.

Hindi lamang sina Maymay at Ben&Ben ang mga Pilipinong umaasang makapasok sa Grammy Awards 2027.

Kabilang din sa mga nagsumite ng entries sa Best Asian Pop Music Performance category sina Khimo Gumatay, ang Idol Philippines Season 2 winner; ABS-CBN artist Carmelle Collado; at ang It’s Showtime Baby Dolls.

Matatandaang nauna nang inianunsiyo ng mga P-Pop superstars na SB19 at BINI ang kanilang mga entries para sa Grammy Awards 2027 consideration.

Nakatakdang ianunsiyo ang nominations para sa 2027 Grammy Awards sa Nobyembre 16, 2026, habang gaganapin naman ang awards ceremony sa Pebrero 7, 2027 sa Los Angeles.

---

DAHIL sa tinatamasang kasikatan ngayon ng content creator na si Jenela Tuguinay-Cachero, mas kilala bilang Jenela in Japan, napakaraming producers at talent managers ang nag-aalok sa kanya na mag-artista.

Palibhasa’y pretty din siya at kung tutuusin ay pang-beauty queen ang kanyang dating kaya dinadagsa siya ng mga offers sa showbiz.

Pero mukhang hindi bet ni Jenela na pumasok sa showbiz for now dahil mas busy siya sa kanyang pamilya at sa kabubukas lang niyang negosyo na Amèla (Made With Love), kung saan siya ang founder at chief executive officer (CEO).

Nagsimula si Jenela bilang OFW (Overseas Filipino Worker) sa Japan hanggang sa matutunan niyang mag-vlog, na siyang bumago sa takbo ng kanyang buhay.

Kinagiliwan ng mga kapwa-Pinoy at Japanese ang kanyang vlog tungkol sa araw-araw niyang buhay doon. Umaabot sa milyun-milyon ang kanyang views.

Dahil dito, nagsimulang kunin siyang endorser ng mga kumpanya. Sa sobrang kasikatan niya ay na-feature pa siya sa vlog ni Karen Davila, at marami na ring artikulo ang lumabas tungkol sa kanya dahil nagsisilbing inspirasyon sa marami ang kanyang buhay.

Ngayon ay isang bagong kabanata naman ang sinimulan ni Jenela sa pamamagitan ng kanyang brand na Amèla, na nag-aalok ng mga produktong idinisenyo upang makatulong sa mga magulang sa kanilang pang-araw-araw na gawain.

Kabilang sa mga produkto nito ang mommy at daddy bags na may baby essentials, gayundin ang mga baby carrier na naglalayong gawing mas maginhawa ang pang-araw-araw na gawain ng mga magulang.

Sa launch ng nasabing brand, inamin niyang mahilig siyang sumali sa mga beauty pageants noon upang pandagdag sa kanyang baon at tuition.

“Nagdyo-join po talaga ako ng pageants nu’ng kabataan ko. So sideline when I was in college, pang-add ng tuition, pambaon,” aniya.

Pero ngayon ay retired na raw siya sa pageantry, bagama’t aminado siyang nami-miss niya ang pagrampa.

Nag-quit na rin sa kanyang trabaho sa Japan si Jenela at ngayon ay nakabase na sa Pilipinas. Gayunman, hindi raw niya ititigil ang pagiging content creator.