6 yrs. pagkakakulong at P100-K multa sa pagpapagawa ng gusali na sinadyang walang firewall

ni Atty. Persida Rueda-Acosta - @Magtanong Kay Attorney | December 10, 2020

Dear Chief Acosta,

Ang aking kapitbahay ay nagpapatayo ng kanyang bahay na kadikit ng aking bahay. Hindi siya naglagay ng firewall. Nangangamba ako sa kaligtasan ng aking bahay kung sakaling magkasunog. Tama ba ang ginawa niya? – Lando

Dear Lando,

Ang batas na sumasaklaw patungkol sa inyong katanungan ay ang Republic Act (R.A.)

No. 9514, o mas kilala bilang Fire Code of the Philippines. Nakasaad sa Section 7 ng nasabing batas ang sumusunod:

“SECTION 7. Inspections, Safety Measures, Fire Safety, Constructions and Protective and/or Warning Systems. — As may be defined and provided in the rules and regulations, owners, administrators or occupants of buildings, structures and their premises or facilities and other responsible persons shall be required to comply with the following, as may be appropriate:
d. Provision on Fire Safety Construction, Protective and Warning System — Owners, occupants or administrator or buildings, structures and their premises or facilities, except such other buildings or structures as may be exempted in the rules and regulations to be promulgated under Section 5 hereof, shall incorporate and provide therein fire safety construction, protective and warning system, and shall develop and implement fire safety programs, to wit:
(3) Fire walls to separate adjoining buildings, or warehouses and storage areas from other occupancies in the same building;” C

Kaugnay nito, nakasaad sa Section 12.0.0.4 ng Implementing Rules and Regulations (IRR) ng nasabing batas:

“SECTION 12.0.0.4. Schedule of Fees and Fines. —
3. Failure to provide the following safety construction protective and warning systems as required in Section 7, paragraph (d) of Republic Act No. 9514.

c. Fire walls to separate adjoining alarms fee, or alarms fees and storage areas from other occupancies in the same building. Php 25,000 to Php 37,000”

Ayon sa nabanggit na probisyon ng batas, ang kabiguan ng nagmamay-ari ng gusali na maglagay ng firewall ay ipinagbabawal. Nakasaad din sa kaakibat nitong IRR na ang nasabing paglabag ay may karampatang multa na siyang maaaring ipataw ng Bureau of Fire Protection (BFP) sa halagang hindi bababa sa Php 25,000 at hindi hihigit sa halagang Php 37, 000.

Kung ang paglabag ay sinadya, at ito ay napatunayan sa korte, ang nasabing paglabag ay may katumbas na pagkakakulong na hindi bababa sa 6 na buwan at hindi hihigit sa 6 na taon, o multang hindi hihigit sa Php 100,000 o parehong pagkakakulong at multa.

Nawa ay nasagot namin ang inyong katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.

Maraming salamat sa inyong patuloy na pagtitiwala.