5 tiklo sa P3.5M shabu

by Mervin Reyes @News | September 15, 2026

Photo: PDEA Regional Office BARMM

Arestado ang limang katao at nasamsam ang tinatayang P3.57 milyong halaga ng hinihinalang shabu sa magkahiwalay na anti-drug operations sa Maguindanao del Sur at Maguindanao del Norte.

Ayon kay PDEA-BARMM Regional Director Edgar T. Jubay, unang naaresto sa buy-bust operation sa Brgy. Kanguan, Datu Piang, Maguindanao del Sur ang 32-anyos na lalaking si alyas Toy.

Nakuha sa kanya ang 10 heat-sealed sachet ng hinihinalang shabu na nagkakahalaga ng P3.4 milyon.

Samantala, apat pang suspek ang naaresto matapos buwagin ng mga awtoridad ang isang hinihinalang drug den sa Brgy. Sarmiento, Parang, Maguindanao del Norte.

Kinilala ang mga ito sa alyas Dopol, 50, sinasabing maintainer ng drug den; Nonoy, 48; Jerry, 55, at Ronald, 40, pawang residente ng Brgy. Sarmiento.

Nasamsam ang 19 sachet ng hinihinalang shabu na tumitimbang ng humigit-kumulang 25 gramo at nagkakahalaga ng P170,000.